29 de jul de 2011

Tornar competencies

¡Ái, qué aburrimientu de branu! La rede ta murnia, y bono, l'asturblogosfera tamién.

Gracies qu'anda prehí'l PP, qué fadríamos ensin elli, y anden que quieren tornar competencies pa Madril.

¡Ésta ye la victoria del PP nes autonómiques, de la drechona!

Y eso sí, allégrame, per otra banda, que fora a costa del PSOE, que ye la fuercia más antiasturiana qu'hai, arriendes de tar vendíos tamién al gran capital. Eso sí, ehí quedaron avances sociales, como los matrimonios homosexuales, y cuido que con ello, tamién se llegó a una mayor dignificación d'esti colectivu, el de gais y llesbianes. Eso tevo bien...

Pero'l Reinu quedó en manes del capital: Bancos, Constructores, Enerxétiques...

La política económica quedó al debalu, a lo que xente como'l Pocero o Fernando Martín (de Martinsa) o Emilio Botín dixeren.

Nun s'avanzó en tantes coses...  Y agora ZP toca la campanina y suenen eleiciones.

Dende esti país, va presentase la opción rexonalista Foro Asturias, que pol so nome vese bien el so rexonalismu. ¿Pero qué ye'l Rexonalismu y qué diferencies hai col nacionalismu?

Intentaré, metanes un magazine de branu falar un poco de Rexonalismu y Nacionalismu Asturianu, na nueva sección "La Ouvea Xalda touvo una nación... Xalda"

28 de jul de 2011

L'agricultura ecolóxica xorrez n'Asturies

Ésta ye una bona noticia, sí señor, esbillada dende'l portal de la RTPA. Polo menos pa los que somos del tema.

Home, nun me quiero dexar llevar pola emoción -lo bono son los cultivos industriales masivos tranxénicos, que dexen más cuartos- pero bono, como güei teo'l día irreverente, permitome esta llicencia.

Por cierto, los ocalitos nun son precisamente un cultivu ecolóxicu, anque los cuches bien, col cuchu de lo bono, bien fechu, y de vaca del país. L'ocalitu va meyor con fosfatos industriales, con abonu d'esi agresivu, que vien en sacos, y eso. Anque tampoco pasa gran cosa si nun se cuchen, ellos lo que piden ye agua. Les condiciones fitosanitaries del tarrén son pa ellos inocuaes. Como si nun entren los xabariles. Tanto meyor, asina nun los joden.

Pero tán bien los cultivos ecolóxicos, magar nos llamen hippies. Eso si sos nuevu, si sos vieyu ya gastas pucha, entós llamente zarráu.



Pero bono. Un güertín pequeñu, ye lo más agradecíu que pue haber. Y non sólo eso, unde entá queda biesca brava, hai fruta xabaz como arándano, que ye de lo meyor, y pa min ye una oportunidá de futuru. Les frutes colloraes, como l'arandanu, la frambuesa, la grosella, les mores, pero tamién la fresa, la guinda y la zreza van tener, nun mercáu futuru, munchu éxitu. Tanto pa la ellaboración de dulce o mermelaes, como pal so consumu frescu. Y nun había qu'escaecer la so exportación,  faza países europeos y anglosaxones unde se consumen bien. Y piden un clima como l'asturianu....



¡Ái, el nuesu campu! Ye fonte de sabiduría. Muncho nos queda inda que mirar ehí pa conocenos meyor, y de xuru, prosperar como pueblu (y asina atopar el nuesu llugar nel mundu).

Por cierto, n'Asturies yá hai empreses que se dediquen a esto... ¡Sedrá por praos!

Director de Política Llingüística

Yá salió escoyíu'l nuevu Director de Política Llingüística del Principáu d'Asturies. Fiximos una encuesta, y nun salía na encuesta... Punxeramos a Taresa Lorences, a Xulio Viejo, a Fernando Álvarez-Balbuena y al mio favoritu, Steven Seagal. Pero non, al final, el que ganó foi Alfredo Ignacio Álvarez Menéndez, qu'entraba dientro de la opción "Otru/a que nun punxe".

Francamente pensaba que diba ganar Steven Seagal, y foi'l candidatu más votáu.  Más que nada pol so perfil, a min paecíame que podía casar col estilu de trabayu a trés turnos de Cascos. Eso y que refierse a Asturies como país tamién.

A Alfredo nun lu conozo, nun sé mui bien quién ye. Supongo que sedrá un bon filólogu y un bon asturianista, pero nun teo'l placer de poseer más referencies d'él. Eso sí, dame que va tener bona sintonía cola Academia de la Llingua. Yo eso nun sé si ye bono o malo.

Namás-y pueo desear muncha suerte, y que torne l'Uvieo a primera.

26 de jul de 2011

Nun sé que fixenon pa Gazteiz de les llingües minorizaes

Nós, n'Asturies tenemos una llingua minorizada: el gallego-asturianu: pertenez al conxuntu gallego-portugués

...

Bó, y tamén temos el asturiano ou asturleonés. Nun se ye da tamouco nada mal aquelo de ser lingua minorizada.



Y ye verdá, que dientro del Reinu d'España y de la República Francesa hai bien de casos de llingües y dialectos minorizaos. Sí, dixe bien, dialectos minorizaos.

Son casos d'estaos con un fuerte pensamientu imperialista, los d'Europa Occidental. Ta ehí el casu británicu, el francés, l'español... Fonte d'esi pensamientu imperialista dase un xacobinismu llingüísticu interesante, ú son les fales parisina y madrilana las de más prestixu, polo menos n'España y Francia.

El gallegu, l'asturianu, el vascu, el catalán, l'aragonés, l'Occitanu, el bretón, el corsu, l'alemán d'Alsacia y Lorena y el portugués de los enclaves fronterizos españoles y el flamencu del requexu norte de francia sufren una situación de, digámoslo en términos económicos, competencia deslleal, frente al castellán y al francés.

Pero, ái, tamién dientro del ámbitu castellán o francés -más puramente llingüísticu- danse casos similares de minorización dialectal.

Y esto vese bien namás char un mirar dientro del mundu que fala les llingües minorizaes. Si falo asturianu, nun habría tanto reparu, si por cuenta puengo a escribir na mia variedá occidental del idioma. Ya falar, en cualquier contestu, con palabras ou xiros d'aquel falar. Anque ye bona verdá que n'Asturies ye'l falar d'Uvieo, pero sí, nun hai una discriminación dialectal tan fuerte como pal casu castellan.

Fálase de billingüísmu nel estáu, pero nun se fala de bidialectalismu. Áh, l'asturianu tien los sos dialectos, como gallegu o aragonés o catalán, que tienen los de so. Pero tamién los tien el castellán.

Fai un tiempu sintí a un músicu castellán (de la parte Valladolid) dicir tamién la so fala taba presionada pol xacobinismu uniformador del aparatu. Y llevaba razón.

La recién nomada va pocos meses miembra de la RAE, Inés Fernández-Ordoñez dicir lo miesmu, nun tien mayor relevancia la reivindicación dialectal n'España. Y falaba de bidialectalismu, precisamente. Y llevaba más razón qu'una santa.

Hai dialectos n'España del castellán interesantes. Nun digamos per Sudarmérica. Pero n'España tenemos a parte del español más o menos amestáu dialectos con personalidá: ta'l montañés pa Cantabria y alredores, ta'l castellanu de la parte Aragonesa, el mañicu, ta lo que falen pa la parte de Lleón -non pal Bierzu, non pa la Montaña, sinon nel Sur, que tien bien de personalidá.

Pal Sur de la península, Andalucía, Estremadura, Murcia, Castiella-La Mancha tienen la so bayura... Estaría bien reivindicar o conocer meyor eses realidaes.


Tornando pal nuesu País, equí esiesti una reivindicación de la llingua asturiana. Y arreyada a la mesma, de la manina, otra del gallego-asturianu. Eses dos llingües cunten nel debate nacional. Y tienen detractores, xeneralmente éstos sofitense nel castellán. Pero nun los va ver naide apoyando les espresiones castellanes más pures y arraigaes dende la castellanización, les espresiones más asturianes d'esta llingua.

Por cierto. Yá remembro una conversación nun auténticu Think-Tank patriu (un chigre) ú un amigu filologu dicíame too enfotáu que la palabra asturiana "guaje" entraba dientro de la esfera dialectal castellana; polo tanto sedría un préstamu al asturianu d'esa llingua, pero entá siendo una palabra asturiana como la que más. D'ehí guaḥe (o guaxe, peme que ta recoyíu).

Na mia parte, cuido que  guaḥe dizse de manera despectiva nos pueblos. Neñu ou Nenu yía la forma cariñosa, mentres guaḥe yía más despectivu.

Uruguái ganóu la Copa d'América 2011

25 de jul de 2011

Yo yá lleí la entrevista n'El Comercio

Y digo: ¡Qué non, qué non, qué non! Que Cascos nun m'inspira confianza. Lo cual nun quier dicir qu'Areces (cola so F$A) fora la caña, de fechu allegréme abondu cuando nes últimes eleiciones foren tomar... bono, perende.

Agora, ente les últimes ocurrencies de Cascos, ta la de privatizar SEDES y la RTPA.

Bono. Él va reculando, como tamién cola Caxa d'Aforros, que yá nun tamos en campaña, y les coses son como son. Eso sí, presta ver como entiende la prensa asturiana, d'esi amarillismu chillón, como'l berru d'una gocha paradiega de xabaril. Fai gracia.

A min paezme que, los mal llamaos chiringos socialistes -polos periodistes neolliberales de la prensa llariega- nun son en sí un problema. Ta bien tener una empresa pública de construcción, y más viendo como el mercáu nun regula la economía por sí mesmu. Porque a la vista ta que ye un fechu contrastable. Si dexes la facienda y el país en manes de bancos y constructores esto va a la mierda a la llarga. Vaya, ye lo que tamos viendo. Asina que'l mercáu nun furrula si lu dexes andar solu. Si ye verdá que tán los Masaveu tres Foro Asturias, SEDES de xuru va tener los díes cuntaos.

Cola RTPA la cosa yá cambia. ¡Ái, qué golosu una empresa de telecomunicaciones al serviciu d'ún! Esa llibra.

Pues pa min nun tenía que ser asina. Eses empreses claro que teníen que tener una auditoría, y les cuentes clares pa tola ciudadanía, porque son empreses públiques. De toes y toos. De los Masaveu, pero tamién míes. Y vuestres tamién. Otra cosa ye que xestione" 'l primu de" o "'l vecín de" o "l'amigu de". Cosa distinta son los negocios del casu Marea por exemplu. Un chiringu ye cuando les empreses públiques furrulen como "cortijos" andaluces, col señoritu y los siervos, y tola comedia esa. Pero una empresa pública -y con esto nun toi diciendo qu'igual SEDES o RTPA sían optimes, o non- han furrular d'un mou ensembre, seriu. La verdá ye que desconozo como trabayen. Pero neso s'ha incidir, non en privatizar a lo xo.

Respective al casu llingüísticu, bono. Desendolcar la Llei d'Usu (y disfrute) ye pernecesariu.

Pero la entruga ye ¿Va falar dalguna vegada Cascos n'asturianu (o gallego-asturianu) o va siguir citando a Cervantes o otros clásicos en castellán?

22 de jul de 2011

¡¡¡Cúmo echaba de menos las encuestas!!!

Áh, pues ehí va la primera. Pa los amantes de la llingua  asturiana. Dizque, prehí, el/a siguiente Director/a de Política Llingüística va ser un profesor/a d'Universidá... ¿Quién vos paez? Yá podéis votar na mio encuesta

20 de jul de 2011

Camps kaputt

A cada cocho ye chega el sou Samartín. Aí xa ye chegóu al presidente da Comunidá Autónoma de Valencia, Francisco Camps, imputao pol tema da trama Gürtel. Bó, nun ye chegóu aínda, peró pode que ye chegue, de mano salíu antes que ye botaran. Xa é dalgo...

Oíde por certo, agora dicen que Cascos nun pode ser asturianista porque nun nacéu n'Asturias, senon en Madril... Cómo se eso fora úa cousa importante. Cuidao, eu digo que nun é asturianista porque sempre mamóu del qu'el PP. Y ese nun é un partío asturianista. Pode qu'agora teña máis sensibilidá "rexonalista", peró que nun nos engañemos. Xa vei vese coas súas políticas...

Peró non. Calqueira pode ser asturinista. Nun fai falta nacer n'Asturias. Eu xa conocín asturianistas nacíos en Madril, en Bos Aires, en México, na Habana, en Montevideo, en Tampa, en París, en León, en Bruxelas.... fiyos da nosa emigración. Y por qué non, asturianistas hailos en Castela, na Galicia en Cataluña, n'Andalucía, As Canarias, Aragón.... etc, y muitos outros sitios que nun vou poñer porque sería un nun acabar.

Y mentres, a seleición del Uruguái a xogar a final contra el que gañe ente Venezuela y Paraguái. ¡¡Si xa lo dicín eu!!

18 de jul de 2011

Siguimientu de la Copa d'América

Sorpresón: Paraguái ganó a Brasil. Bono, nun lo ganó, pero eliminolu nos penales.

Vaya tremendu.

 Qué conste que son una seleición ordenada y correosa, competitiva como ellos solos y ameriten tar ehí. Y los brasileiros qu'espabilen pa otra.

Agora toca Perú Vs. Uruguái y per otru llau Paraguái contra Venezuela. Venezuela ye la revelación d'esti campeonatu, pero sedrá difícil contra Paraguái.

Ah, son (Paraguái) dignu rival pa Uruguái na final, pa min son anguaño les dos meyores selecciones de Sudamérica. A ver, si lleguen a la final, cuála va ser la meyor.

17 de jul de 2011

L'asturianismu del discursu d'Álvarez-Cascos

¡Cuántu revuelu! Na prensa asturiana, que sigui anclada na segunda metá del sieglu XIX, anden apamestaos entá col discursu "asturtzale" de Cascos.

Ye, seique, chocante, porque Cascos tampoco ye que vaya más alló del asturianismu del sieglu XIX. Sicasí, la prensa asturiana (y falo de LNE y LVA) allorien: Los unos por que-ys fiede tolo que sía asturianista, y los otros porque agora, como son "progres", meyor el Réxime Arecista (o'l propiu PSOE coles sos midíes prolliberalistes) que cualquier otra cosa, magar-y chisque un güeyu al asturianismu.

Porque ehí ta. El discursu de Cascos, o meyor, el discursu d'un presidente del Principáu tien que paecese -ideoloxíes a parte- a eso. Y voi esplicalo. Cascos ye un políticu neocon, lliberal y de dreches. Pero agora ye Presidente del Principáu. Y como talu, tien que facer política asturianista, cosa que nun implica siguir un palu dixebriegu, nin nada pol estilu, pero eso sí, y cito del so propiu discursu, ú reivindica'l fechu rexonalista asturianu avaláu por "la peculiaridad histórica, geográfica, administrativa, cultural y lingüística".

Nun me paez tal discursu nacionalista -depués de lleelu enteru tou- pero llama l'atención les enxigues que fai sintir esti discursu, polo menos, a lo qu'a los medios escritos asturianos dizque. N'especial, a LNE. 

Ye precisamente'l de Cascos un discursu poco nacionalista, IDEAS mesmu (dende'l mio mirar, claro) tien un discursu asturianista más fuerte. Nun falemos d'IX, BA-UNA o PAS... 

En cada discursu Casquista reivindicase la nación española. Pero eso nun importa. Eso sí, ambura a les oreyes tolo asturianu... Pero ye un Presidente del Principáu, ¿qué va reivindicar? ¿La llingua castellana? ¿La hestoria gallega? ¿Les costumes y tradiciones cántabres? ¿El folclor andaluz? ¡Mialma si nun paez que tal había ser!
Bono. LNE tien enta muncha fuercia. Remémbrennoslo nes sos páxines, nes cifres de llectores qu'asoleyen. Pero otros (por exemplu Rupert Murdoch) tamién cayeron. Tiempu al tiempu...

El chinu. Nesa llingua tenía que mandase pa espublizar LNE.

La Celeste a un pasín d'alzar la Copa d'América

¡Ái, qué bien, que l'Uruguái ganóu a l'Arxentina na presente Copa d'América!

Pola parte de l'Arxentina, la cousa taba vista. L'albiceleste gana siempre los amistosos, pero cuando llega la hora competir, apágase. Ya equipu sí que tienen: A Messi, Higuaín, Tevez, Agüero, Di Maria... Pero nun furrula l'equipu, ya sabíase qu'anque-y metieran trés goles a Costa Rica nel partíu anterior, contra una seleición fuerte cumo la Uruguaya, la cousa diba floxear, porque la seleición de fúbol arxentina nun tien sistema, dende vei yá tiempu, ya colocan los xugadores cumo si se tratara de cromos.
Pero, cuidadín. L'Uruguái ganóu esta vegada. Sí, ya yía un equipu fuerte, agora miesmu, pero yía un xigante con pies de barru tamién, porque atrás son bastante febles. Nun yía la defensa la meyor llinia de la Celeste, anque ayeri valéu-ys.

Con Brasil nun momentu de tresición, confío que, énte la falta de sospresas, sía Paraguái la outra seleición de las que quedan que-y pueda poner el pía al Uruguái, pero los partíos inda los hai que xugar, ya d'ún nún.

El partíu foi xugáu en Santa Fe, n'Arxentina, ya'l seleicionador uruguayu yía un vieyu conocíu: l'ex entranador del Real Uviéu Óscar Washington Tabárez, que yía ún de los meyores conocedores del fúbol sudamericanu.

¿La hinchada arxentina? Bono... Amirái, por favor...

15 de jul de 2011

Nuevu Gobiernu del Principáu

Yá ta. El nuevu gobiernu del Principáu d'Asturies: Atención, nun hai nengún conseyeru de Xixón nin de les Cuenques, sacante d'Ana Isabel Álvarez González, ayerana de Nembra.

Ehí va vese un cambéu col executivu anterior, unde primaba la xente de Xixón, Mieres o Llangreo.


La verdá que ye una cosa que tal paez una tontería, pero non, nun lo ye. En verdá ye una cosa que tresciende de lo anecdótico, y tien (o va tener) muncho aquel, yo diría ser dalgo más que simbólico.


Habrá que ver. De mano, Cascos tien 100 díes per delantre que dicen de confianza. Eso sí, nun quita que'l sistema, l'estatutu o temes similares nun sían intocables; pero nesti intre les acciones polítiques del nuevu gobiernu, bono, nun les hai que discutir con too l'aquello.


Respective al asturianu, pa min que la cosa va dar pasinos, insuficientes, pero pasinos. Respective al emplegu y la creación de riqueza, soi más escépticu; eso sí, creo que se va acabar con bien  de redes clientelares difuminaes per tola xeografía d'esti país, y espero que Cascos nun implante les de so. 


Pela cueta soi escépticu tamién nel tema del sector públicu, la sanidá y la educación que yeren coses, qu'en principiu, furrulaben bien n'Asturies, pue ser qu'acabe con ello; y, arriendes, dicir que sigui paeciéndome que Cascos desconoz abondo esto qu'él llama - con xeitu de veres- país.


Así qu'así, dende güei , tendremos darréu cuatro años suficientemente llargos pa comentar too esto con más pricuru y detenimientu...

14 de jul de 2011

El Muséu de Grandas, de película

Ésta yía la noticia _________

Bono, pa quién nun quiera entrar, trata de que van facer una película nel Muséu Etnográficu de Grandas de Salime.

Ya yá lo imaxino....

Nel papel d'Eustaquio Revilla, Robert de Niro. Nel papel de Pepe El Ferreiro Danny Trejo.  Nel del sou sustitutu, Quentin Tarantino... 

Dirixen la película Quentin Tarantino ya Robert Rodríguez....

Ya la cousa vei d'un home que tenía un Muséu Etnográficu, pero yera un antisistema, ya vivía con un furón ya una calabaza cola que falaba, pero la cousa tuércese cuando sal escoyíu un alcalde satánicu ya individualista, que quier cobrar la entrada al muséu más barata -¡güeyu! Un muséu nesti casu nun rumia- ya entós vei ya dici-ylo a Areces -que lu interpretaría Danny deVito ou Joe Pesci- ya la cousa acaba mui mal, porque lu destituyen (al Ferreiro).

Pero entós el Ferreiro fala con Cascos (Stallone) ya abandona'l PP ya vei camín de Grandas ya ármase una bona, ya hai llitros de sagre ya, buó, nun cuento más porque vos jodo la película ya entós nada, pero que paga la pena.

¡Ya quién vería la voz n'off d'Ambás na presentación...! "El Ferreiro tenía un Muséu en Grandas de Salime unde imponía la sua llei: la Llei del Ferreiro..."


Pues eso tán grabando....

Teddy Bautista

Tevi too esti tiempu enredando colo del blogue, conque nun siguí mui bien les noticies, porque, bono, WordPress absorbióme un bon tramu de materia gris del mio cerebru y eso, pero na SXAE (bono, na SGAE meyor) hebo la de coller....

Ah, y agora viénme a la memoria aquella entrevista na TPA al gran Vitor Manuel (anque él firme como Victor Manuel) na que dicía aquello de "si nes bodes nun paguen drechos d'autor, qu'el noviu llea El Quijote".

Nun-ylo toméis a mal, pero si Cervantes alza la cabeza, bono. Cuido que del sustu vuelve voltiala p'abaxu.

Ye una pena. Quédome con esta canción:

13 de jul de 2011

Acabamos en blogger

El casu foi qu'en Nireblog tratanonnos bien. Pero pechóu, porque son una camada d'españolistas ya opresores.

Ya unvianonnos cara WordPress, pero you inda nun m'aclaréi.

Ya acabéi en blogspot. 

Pienso facer un blog n'asturianu (occidental) cumo Dious manda, cumo nun se feixo dende... dende... dende.... .

Bono, si al final el salmón siempre torna pal narcea.... anque tea más muertu que'l Campanu d'esti añu!!!