23 de abr de 2012

10 meses ensin presupuestos




Güei chei mui güeyu a la sesión matutina de la Xunta Xeneral, ya sí ví aquello... ¡¡¡Ya bien me prestóu, qu'inda penséi que, polo menos, yera cousa aburrida!!!

18 de abr de 2012

YPF quieren que pase a manes públiques

Lo prometío, ye delda.  Voi falar d'YPF.

La última noticia foi el proxectu de llei del Congresu de l'Arxentina pa estatalizar la empresa propiedá de la multinacional Repsol.

Bono, YPF foi un monopoliu públicu (Yacimientos Petrolíferos Fiscales) privatizaos metanes la dómina de lliberalismu ultraortodoxu y radical fecha pol so presidente nos años 90 del pasáu sieglu Carlos Menem, que demientres diba privatizando les empreses arxentines y con una política monetaria de paridá ente dólar y pesu arxentín llevó a l'Arxentina y al pueblu arxentín al colapsu económicu y a la intervención del F.M.I.

Nesi entrín, de privatización, el Reinu de So Católica Maxestá, gobernáu pol bufón NeoCon -poro, NeoLliberal tamién- Pepemari Aznar, tamién sigui'l camín de los últimos gobiernos de Felipe González, cola destatalización de los monopolios públicos -la Telefónica, la Campsa, Repsol mesmo, Iberia, y de maga más- creando importantes grupos empresariales privaos capitalistes.

N'España eso, más les aportaciones en forma d'Inversiones en Capital veníes de la Xunión Europea y cola intervención nuna especie de New Deal col Dóberman de Ministru de Fomentu faciendo infraestrutures como un llocu, y l'espoxigue de la construcción, faen medrar la Bolsa, y actívense tolos mecanismos de miedre del capital, dispuestu pa la Reconquista Llatinoamericana.

La banca, col Santander -al que-y ponen nes manes el Banesto interveníu tres la escandalera de Mario Conde- y el BBVA -qu'absorbe la banca pública- faise con un gran puxu un llugar señeru nel sector de la banca. Y Iberia, que merca les Aerolineas Argentinas. Repsol alquier, por un preciu perbaxu -un preciu qu'equival a un percentax bramente baxu de los activos d' YPF -sólo de les reserves petrolíferes yera un tanto por cientu mínimu- y apaecen ente los amigos d'Azanar y otros cuadros del PP una nueva clas d'executivos d'ésitu.

Mentrestanto, na Arxentina son los años de les cacerolaes col Corralón y el Corralito. Los arxentinos son descendientes mayormente d'Españoles y Italianos, y neso nótase muncho cuando queda na memoria la imaxe del Corralito, yá que ¿quién remembra lo del Corralón?

L'Arxentina arruinada, y España en camín, siguiendo la ruta que los políticos arxentinos marcaran. Eso sí, con delles diferencies, pa ser xustos:

-La economía arxentina ta muncho más suxeta a los mercaos de materies primes; asina ye qu'agora que meyoren la so economía miedra.... pero de la que vuelvan baxar - yá lo verán, pero lo que nun sé ye cuándo... cuando salgamos de la Crisis Cíclica Capitalista- volverán los problemes financieros y económicos d'esi país.

-N'España hebo tamién una "borbolla" creada al delláu de la industria de la construcción, que aceleró'l crecimientu económicu y presentó unes magnitudes macroeconómiques de llamar l'atención... y que dempués tornaron nesti paru tan altu qu'hai güei.



Pero otres coses, sí se repiten, y vuelven repetise:

-El nulu gastu n'I+D+I.

-La nula previsión económica; a sabiendes de la dependencia de la economía arxentina de los mercaos de materies primes, l'Estáu nun va invertir nenguna ganancia n'afitar nenguna midida de desarrollu estratéxicu (sectorial o estatal) pa frenar esta dependencia [Más o menos como na España de la medría de la construcción; si bien equí quedaron grandes empreses capitalistes con tecnoloxía punta nel sector].

-La fuerte dependencia del esterior, que nel casu arxentín va caese en manes del FMI y nel español de l'Alemaña.

- Finalmente, l'ataque a les clases medies y l'arriquecimientu xabaz de les clases altes del Gran Capital.




Ye, a mui grandes rasgos y esplicáu de manera mui rápida, nesi contestu, ú los arxentinos quieren facese otra vuelta con YPF.

A min personalmente, dame lo miesmo, porque Repsol ye una empresa privada, en manes de queseyoquién. Por nun saber, nin sé ú tributa. Polo que teo lleio, un 25% del so capital tributa n'España, pero supongo que pagará tolo mínimu que pueda. Y, eso sí, exercerá una presión previsiblemente fuerte.

Pero ta claro que cuando los tiempos d'Aznar paecía qu'España yera la nueva Suiza. Equí too daba perres, y el más tontu, empresariu [buó, tampoco ye esactamente asina, cuidao]. Pero lo que quiero dicir ye qu'esto agora ye un desastre:

-El sistema financieru foi al carayu, pero entá-y metieron perres pa fartucalo bien... y como rempuesta, lo poco qu'había mediu públicu (les Caxes d'Aforros) pasen a furrular como banca privada.

-La Reforma Llaboral favorez a los empresarios frente a los trabayadores d'una manera perinxusta.

-Les llamaes "midíes d'axuste económicu" que toquen a sanidá o educación van llevanos a otros tiempos más p'atrás.

-Los casos de corrupción a tolos niveles y protagonizaos por tolos colores políticos son d'escándalu. El PP, que gobierna na mayoría d'autonomíes y nel Estáu ye una fonte inagotable d'escandalos, y ta implicáu en milenta trames de corrupción. Y el PP, idem. N'Asturies, hasta roben xuntos, nes sos "finques" particulares.

-Ye más, n'Asturies ye agora llave pa la formación del próximu executivu un partíu apoyáu por fascistes como Ynestrilles, con bien d'ingredientes de partíos ultranacionalistes conservadores.

-La Casa Real, que dende'l so privilexu constitucional ye'l mayor niciu ú se ve tol panorama de corrupción y inxusticies.


Conque, nun creo que la Arxentina vaya facer el negociu de so vida. Tampoco conozo los balances d' YPF [Bono, y tampoco creo que los entendiera ;)]. Pero vi fai tiempu un vidéu de Chávez, que bien me fixo pensar. Y cuidadín, que nun ye un personax que me caiga especialmente bien. Pero gústame menos tovía Rajoy o ZP.

Y Chávez -que ye'l degorriu, y llévase mal col Borbón, lo cual yá diz muncho- falaba de la posibilidá de privatizar la filial venezolana del BBVA ellí. La tesis yera cenciella: Si'l sector financieru ye estratéxicu pa un país y de tal vital importancia... nun se-y puede rescatar tan a lo xo, inyectando lliquidez y cruciando los brazos. Si hai qu'intervenir nuna cosa asina, de tal magnitú igual convien pensar que tien que ser del estáu -tamos falando d'un sector estratéxicu, como correos o l'exércitu-. Y Chávez dicía que sí, respetaba la propiedá privada, sagrada, pero si ye estratéxicu y tien que meter cuartos... entós tamién tien que controlar.

Les palabres de Chávez falando de volver la banca intervenida al pueblu faen qu'alcen les manes montano una escandalera dende la reacción dende los sos corifeos hasta los secundarios y los secuaces que menos pinten. Y la xente del común, preocúpase. Ésto ye inxusto. 

Ye increíble yá'l nivel d'alienación al que nos tien sometíu'l sistema. Pero polo menos toi seguru que dalgún día, a toos éstos actores d'esti circu -periodistes, grandes empresarios capitalistes, políticu peselbreros, estamentos privilexiaos- la Hestoria pondrálos nel sitiu que-ys corresponde.

16 de abr de 2012

El Rei jodéu una cadera cazando elefantes

Yá nun sospriende nada.

El Marichalar, faciendo'l monu. L'Urdangarín, un putu mangui, que panriba queda llibre. El fíu de Marichalar, menor d'edá, que se pega un tiru con un arma pa matar xabalinos. La reina, que diz que son cousas de rapacinos. El rei, agora sí, camín de Botswana cazando elefantes, que jode una cadera. N'España naide del gobiernu sabe ou quier saber nada.

Eiquí tampouco vei pasar nada, ya tovía van sacar una escandalera ou milenta más si fai falta. Los medios, ensin vergoña, tratando tapecer tola morralla qu'esta xente produz.

Nel mundu, España yía la risión: Un miembru de la OCDE diz qu'España sólo val pal vinu ya pal flamencu [Asturies, cumo non, nun pinta nin res.] Eiquí, eso sí, l'arguyu españolista sal bramando.

L'Arxentina, mentres, espropia YPF ya con ello deixa a la empresa REPSOL, símbolu del Capitalismu Aznarianu (vaya, del sou ésitu ya del espoxigue na sua dómina) en calzón. El gobiernu d'España que nun sabe que facer, aínda ta pola masificación d'alumnos nas aultas (de la enseñanza pública, por supuesto). Ya dicen que yía cumo midida d'aforru. Eso sí, eiquí la corrupción venga d'au venga.

Así qu'así, nun m'entra na mia tiesta de freakie cúmo pode ser que'l Gobiernu de Rajoy defenda los intereses d'una multinacional que yá cotiza por mediu mundu, cola idega de qu'esi yía un ataque a los intereses españoles ya que vei tomar mididas: ¡Ah, voto a bríos, el honor de la Madre Patria ha sido mancillado! Pero llueo, ai non, eso sí; bien defenden cumo portadores d'un programa lliberal las privatizaciones ya la llibertá económica col laissez faire sobre'l capital: Empresarios del Mundu, enriqueceivos.




Ya llueo, cuando lleo noticias cumo ésta, unu nun sabe si rir ou chase a temblar. Ou si rir mentres las piernas treman.

Ésti país (Asturias ya España) yía una vergoña. Ya cada día toi más convecíu que -si foi que nun houbo yá muncha ruptura pa col sieglu XIX- que tamos volviendo p'aquellos tiempos.






Pd. Los Arxentinos -pouco ou nada sospechosos de "visionarios de los negocios"- faen una operación que bien-ys vei pesar, ya áu cuatro cacicones (la gran mayoría españoles, pero tamién arxentinos ya xudíos) van garrar los cuartos pa que los arxentinos de la cai gasten los cuartos. Pa outra, falamos d'ello.

11 de abr de 2012

¡¡¡Intentu de suicidiu d'un nietu del Rei!!!

Güei amanecéu con esta noticia: L'intentu de suicidiu de Froilán, nietu del Rei. Fuertes cercanas dicen qu'intentóu en vano facer un harakiri, pero bono, fallóu porque resulta que'l pía nun yía un muérganu vital.

Cúmo non, la Casa Real ta en plenu consternada. Pero claro, al neñu poudolu la presión, de ver cumo l'Iñaki Urdangarín yía un putu mangui ya cumo nesti estáu de pandereta la xente pasa la llei pol forru, ya asina ven que vei quedar llibre. Dizque perdéu la esperanza ya nun lo poudo soportar, ya poro, pegóuse un tiru.

Pasa que, cumo bien se sabe nada más chisque ún un pouco na hestoria, los Borbones ya las armas de fuegu nun se llevan mui bien, ya nesa familia real poné-y un arma de fuegu a un miembru vei acabar contemplandose antes cumo magnicidiu que ver un xuiciu xustu a Urdangarín.

Pues nada, el neñu taba por una finca del Mundu Ruraliegu de Soria -sitiu con poucos oucalistos- con una escopeta d'estas que valen pa matar xabariles ya (bono, taba col sou pai, Jaime de Marichalar, enemigu acérrime de la Monarquía) ya sabe Dious lo que se-y metéu na cabecina, qu'agora arreglóu un pía. Nada, ya la Reina pa disimular diz que "con los niños siempre pasa eso"; ya home, yía verdá, un día salse pola cai ya veslos a tiros, con armas de fuegu. Lo raro yía que nun se maten más...

Pero sí ho. Bien de veces se tienen vistos neños de trece años con escopetas con un calibre 36 prehí enredando.

Nada, you sigo colo míu, ya sofito la teoría de que foi un intentu de suicidiu, ya los medios tenían que tar ehí cola Monarquía porque cola presión que tienen agora hasta los mas nuevos intentan matase... Porque si sal lo que todos tamos pensando.... ... .. .

9 de abr de 2012

¡¡¡Los Países Baxos Asturianos!!!

Esta Selmana Santa fumos pa la cama pensando en que n'Asturies yéramos un país mui pequeñu, pero bono, nada, qu'esti llunes yá medramos... ¡Venti Metros!

Y fonon ganaos contra la mar. Concretamente nel Conceyo Cuaña, nel occidente.Son los nuevos holandeses d'Asturies. Y pa facer la gracia, dende la Casa Conceyu de Cuaña yá salienon voces soca, pidiendo gastar esos metros llantando unos tulipanes, pa facer la gracia.

Bono, los metros tán ganaos (d'asegún cola noticia) pa la parte d'Ortigueira y El Espín.

Pues cuntome un paxarín qu'agora van dir pidir un hermanamientu ente Cuaña y Amsterdam, pol tema los pólders, que como tán por ganar tarrén al mar, y yá dambes poblaciones saben d'eso, van facelo.



Porque siempre miramos que si pa un llau o si pa otru, pa engrandar Asturies, pero non, equí'l gran escaecíu ye l'océanu, la mar de nuesu. Porque tamién hai una Asturies Insular.

Y equí riránse, pero non; ehí ta la Islla La Deva, pente los conceyos de Castrillón y Sotu'l Barcu, que ye una islla bien prestosa; yo mandaba dalgún p'allá destarráu..... o meyor, diba yo n'esiliu interior voluntariu.

Pero pal Conceyu Gozón, pa la parte'l Cabu Peñes, ta la Islla del Carme, cola so capiya. Ehí tamién me valía l'esiliu, énte tol panorama socio-politico-económicu del país astur.

As Illas Pantorgas, si quierse facer l'esiliu/destierru pa contra poniente... O la Islla d'Amielles, pal leste, pa la parte Llanes.

¡Meca! Cuido que si miraran más pa contra l'interior marín igual atopaben más islles pa reclamar tarren p'Asturies... énte eso y lo que ganen al mar -como los bonos cuañeses- Asturies sedrá un pocoñín más grande cada vegada.