20 de dez. de 2012

Mañana acaba'l Mundu

A dos horas de que s'acabe todo. Ya you teo que dicir que nun séi cúmo vei ser la cousa. ¿Meteoritu? ¿Xuba repentina del nivel del Mar hasta los 800 metros? ¿Plaga zombie? ¿Invasión estraterrestre? ¿Esplosión termonuclear? ¿Un mistu?

Qué séi you... Bono, la cousa acaba, según la versión de los mayas, calculao en base al sou calandariu.

Asina que dientro de duas horas, en cualquier momentu, pue pasar de todo.





De mano, ayer morréu Ámbitu y Les Noticies, y ye cosa que tenía que dicir, y mentar. Con gran pesar, porque yo yera fan del únicu diariu (selmanariu más bien) asturianu n'asturianu. El so llabor demientres estos 16 años foi impagable, y la pena de la so desapaición atristáya abondo. Pero la semilla ta ehí, y naide de los que lo facíen marcha pa l'Arxentina nin nada pol estilu, y la so muerte ta relacionada, de xuru, cola crisis económica. Tamién güei lleo na prensa cumo la xoya económica asturiana s'esbarrumba...






Y nesto xa salíu a conselleira d'educación del Principado d'Asturias ¡Hasta pra fer oposición este Governo é xacobino!

Y venme á memoria un par d'escritos, d'Inaciu Iglesias, el editor del periódico xa desaparecido y del columnista Xuan Bello, refiréndose al presidente (d'aquela só da FSA). Nuna (a carta de Xuan Bello) tría unha cousa escrita, algo asina: "Javier Fernández, como tolos tontos, ye d'estremos". Na outra falabase del gusto del presidente da FSA pol modelo territorial francés, de departamentos.

Bó, el caso é qu'hasta pra facer a oposición, vamos coa oposición oficial estatal. Y agora, contra a Lei Wert, a Conselleira fala da esclusión del asturiano (enténdase: asturiano/gallego-asturiano),  condo elos mesmos teñen a lingua máis qu'escluída. ¡Qué la faigan oficial d'unha vez xa!

19 de dez. de 2012

Les Ñavidaes yá tán equí

...Y con elles les coses de so.

L'anunciu de Fofó, ú sal l'asturianu, el bable. Mui simpático.

Y agora la nueva tradición, nunca meyor dicho....


¡¡¡YÁ LLEGA'L ANGULERU!!!



[Por favor, si yes menor de 12 años nun sigas lleendo esta entrada]




¡Qué simpático tamién! Ye una tradición nacida en L'Arena, pol añu 2007 -y equí perdonái si ando añu arriba o añu abaxo, porque nun voi comprobar- y que yá s'esportó al restu d'Asturies, como se pue ver nesta noticia.

Agora, amás del Príncipe Aliatar ya ta equí L'Anguleru; Papá Noel... que marche camín de Vermont.

29 de nov. de 2012

A favor de la Unidá llingüística y Contra'l Blaverisme!

Que l'Estáu Español ye dalgo plural y plurillingüe ye dalgo que tamos fartos dicir. Equí fálense más llingües que'l castellán/español; pero ye qu'amás ésti tamién tien les sos variantes.

¿Ye eso bono? ¿Ye malo? De mano, ye arriquecedor. Y ye la realidá. Colo que, dende un puntu de vista ciudadano o siquiera ecollingüista, hai que lo caltener.

¿Y cuáles son eses llingües? Ehí ta, por mor d'un procesu históricu, una serie de llingües, a saber: Gallegoportugués, asturllionés, castellán, vascu, aragonés, aranés (occitanu) y catalán. Y si contamos Ceuta y Melilla, árabe y beréber.

Nun ye cosa nuevo. Porque si vamos a la vecina Francia ehí hai bretón, francés, occitanu, catalán, provenzal, alemán, corsu (italianu), neerlandés y vascu.

Nel Reinu Xunío, amás d'inglés, francés (nes Anglonormandes), Gaélicu n'Irlanda del Norte y Escocia, y galés en Galés.

Si vamos camín d'Italia hai tamién muncha variedá, ente les llingües reconocíes tán el francés, l'alemán, y el catalán.

Conque diferentes estaos, munchas llingües y llingües que trespasen fronteres. Porque tamién nos mesmos estaos penínsulares: Portugal y España comparten gallegoportugués y asturllionés; Andorra y España catalán.

Por dalguna razón la mayoría de les llingües tienen una espansión xeográfica que nun coincide cola llinde política. Por exemplu, dixe que'l catalán trespasa la llinde española, y métese por Francia, por Andorra y incluso n'Italia.




Claro que too esto siempre va haber xente a la que-y moleste. Nun sé, quiciabes por chocante, por ignorancia o por mala intención, pero la variedá hai a quién-y asuste. Sobretoo cuando'l nuesu modelu ye un estáu centralista, ú'l progresu siempre s'entiende dende un puntu de vista marxinalista-lliberal; y como resultáu se tiende a "standarizar" too: Standarízase les infraestructures, la enseñanza, la sanidá, la educación, la producción.... Pero ye por una causa bona: Ye'l progresu imparable, eso de lo que los políticos falen: El crecimientu.

Y nesto, la idea del estáu-nación, y les autonomíes, que son el subproductu.

Conque falamos d'unidá llingüítica cumo nexo d'una comunidá definidida... Pero entendemos mal el conceptu. Polo menos dende'l mio puntu vista, claro.

Por dicir d'una manera: ¿Una llingua pa xustificar una autonomía (y con ello poder político ) o l'autonomía p'axudar a protexer una realidá llingüítica?










Pues na península ibérica somos el Circu de los Horrores. Equí tenemos un blaverisme inicial porque dalgunos valencianos dicen qu'ellos nun falen catalán.

Obviamente esto ye porque refuguen un nacionalismu catalán que, tamién dalgunes vegaes, vencéyase a la llingua. Pero a nada qu'ún arrañe nesi blaverisme va decatase qu'esi blaverisme ye parte d'otru nacionalismu al que se xunta un rexonalismu conservador.

Asina que nel problema tenemos yá trés pates: Lo puramente llingüítico, lo xeográfico y lo político/institucional/administrativo. Áh, y una sociedá detrás. Manipulable, non manipulable, de meyor o menor calidá, alienada, concienciada, despierta o dormida.

Agora, tamién p'Aragón, na franxa oriental tienen el so propiu blaverisme:  http://www.facao.com/.

Puff, a min ésti remembrame'l nuesu, l'asturianu, el de casa. 

Sí, lo que pensáis. La llingua mesopotámica. La llingua de transición que trescede. Que nun ye nin lo uno nin lo otro; nin siquiera tolo contrario. La llingua afalada por una señal televisiva dende Santiago...

Teo eso sí, que dicir que detrás d'esti blaverismu patrio nun hai una idea conservadora, nin siquiera "españolista". Ye lo orixinal qu'aportemos.

Bono, y falando del ámbetu gallegoportugués... Tendremos que falar del propiu isolacionismu gallegu. RAG+ILG nun ye igual a gallegoportugués. 

Colo que pueo volver al casu asturianu y dicir que'l nuesu blaverismu patriu-mesopotámico nun ye por separáse con Galicia, sinon con tol entornu de la Lusofonía. Anque d'eso por pena teo que dicir que naide nun s'enteró aínda.

Y finalmente, el de la llingua asturiana. El de la llingua llionesa. L'asturllionés. 

Ésti tovía más cafre. Ehí los políticos que lo afalanon acabanon echaos de la política non por conservadores, sinon por apoloxía del nazismu.

Teo que dicir tamién que los isolacionistes (esto ye, los que ponen llendes polítiques pa xebrar una llingua nel ámbitu alministrativu que-ys compete) dientro del mio entornu, los que más guapo lo faen son gallegos y asturianos de fala gallegoportuguesa. Ehí tolo menos (y nun ye casi nada) básase nuna custión ortográfica. En Llión davezu ye tola creación d'una llingua horrible. De lo qu'echan mano El Galano ou Méndez Ferrín ye dalgo bramente prestoso. Más que digno.

Y ello ye la pena.

¡Qué nun diba podese aprovechar de la lusofonía nel Eo-Navia! L'otru día un amigu de la zona comentábame que teníen más problemes nel enseñu que na parte asturiana. ¡Ai si aceptarán tolo que la Lusofonía-ys ufrez....! ¡Y los escritores! 




Pero pa ser bien xusto hai que falar de la xente valenciano, aragonés, gallego, eonaviego, y llionés que nun  engañen. Colo que nun lleven camín. Lo que sí ve a Catalanes, andorranos, alguereses, baleáricos, valencianos y aragoneses de fala catalán como mesma comunidá no llingüítico; a pesar de tar en comunidaes o países distintos. Lo mesmo pal gallegoportugués. Y cómo non, a los llioneses, que nun sólo a'rriquecen ellos aprovechando lo que-ys podamos ufrir sinon que nós mesmos nos arriquecemos colos sos aportes.














28 de nov. de 2012

Blogue pa siguir

¡Ai, qué prestosu yía atoupar páxinas ou llugares guapos!

Ésti, ye ún d'ellos, y pa siguilu: Un blogue de fauna de Tinéu y Salas, y yo soi d'ehí.

Ganes tenía yo d'atopar una páxina tan interesante. Y recomendala pa los amigos.

Trátase d'una bitácora con información práctica fecha por un biólogu y aficionáu, y trata sobre la fauna de los Conceyos de Salas y Tinéu: Los páxaros, los mamíferos, los insectos... Llámase José Antonio Canal.

Y por poner dalgo, un sitiu pa ver les utres (que ye'l nome, si nun m'enquivoco del Gyps fulvus), la Sierra del Moxagre, un rocosu faciendo llende pente los conceyos de Pravia y Salas.

Dende esti humilde blogue, encamentar Fauna de Tineo y Salas a tolos que paséis prequí.

20 de nov. de 2012

Bon artículu + Rafael Correa

Vicenç Navarro ye una cabecina. Esti domingu tien asoleyao esti artículu nel diariu Público.


Puff. Asturies y España cada día se paecen más, y polo malo. La crisis yá se fai dalgo sistémico y estructural. Y ello marca'l discursu políticu. Anque ye verdá que cambian los mayor domos: n'España visten col tabardu'l PP y n'Asturies col de la FSA, pero...

Porque los dos tán acabando colo público. En Madril la sanidá público ta esbarayándose. Y dende'l Gobiernu d'España retruquen con una contradicción: Mentres tenemos los meyores profesionales (...cásique del mundu) per otra banda son los menos indicaos pa opinar sobre la xestión de la mesma pol so desconocimientu.

Na educación vi ayer nun programa de TV a unes madres faciendo un calandariu eróticu pa pagar el tresporte de los sos fíos camín de la escuela. La ruta, que faen los neños dende casa a la escuelina. Pero, ai non, l'Estáu aprofita con subvenciones l'estudiu nes instituciones privaes y concertaes.

Tan llevando a lo público al colapsu, día a día.


Cataluña, que se quier xebrar del Estáu Español. Tovía toi viendo tol correo-spam que se fixo del boicot a productos vascos y catalanes (sobre too). Y de tanto dir el cantaru a la fonte acabó rompiendo.

Mui dao esti país a boicots fatonos y pataletes infantiles. Y, agora panriba lleguen los escoceses solicitando a Londres un referendum semeyáu al que piden los catalanes... y Londres concede.

L'Estáu Español, incapaz énte la crisis, sumíu polos recortes económicos, ensin solución dala, ta un poco a veles venir. Los capataces tán salvando la situación a les enerxétiques, les constructores (ú por cierto siempre rescampla la constructora pública asturiana SEDES cómo mal mayor, por ser precisamente pública y nun tar en manes del capital autóctonu o alóctonu, que pal casu...), les empreses financieres...

Y pa min lo peor son los desagospios. Cuando queda la xente albentestate porque nun puede pagar unas hipoteques, qu'en fin. Había igual que-ys char un güeyu, pero que manquen bien cuando l'Estáu rescata a la banca, y esta va contra'l ciudadanu. Lo qu'afita qu'esti ye un país al serviciu del capital y non del ciudadanu.


Conque tornando a Vicenç Navarro. Anguaño les oveyes (esto ye, el públicu en xeneral, yo y tu, amigu llector que tas lleendo esto) tamos siguiendo un procesu d'indignación nunos casos y de mieu n'otros. Así, hai xente a la que-y choca yá un discursu socialdemócrata, como'l de Vicenç Navarro. Y nun digamos la xente qu'echa les manes a les vidayes porque-y paez cotrasistémicu, por tar alienaos dafechu, y tener tan interiorizáu'l discursu del poder y los medios que yá lo creen too.



Y nesto, apaez Rafael Correa, presidente del Ecuador. Nuna entrevista con Ana Pastor paez que-y entró la zuna de que los periodistes tán al serviciu del xefe, del dueñu. Y conste que pa min Correa perdió les formes, llamando "Anita" a la periodista. Pero foi prestosu llueo cuando volvió a preguntar por ella; porque foi'l nuevu partíu nel Gobiernu del Estáu el que la mandó a la p... cai. "Desque s'inventó la imprenta, la llibertá d'espresión ye del dueñu de la imprenta".

Gran frase.


13 de nov. de 2012

Fuelga 14P




Garro d'un blogue venceyáu a la CXT esti cartel.

Mañana, día 14 de Payares de 2012 FUELGA XENERAL énte los retrocesos en materia social, llaboral, económica y política que lleven alantre los mayor domos del Capital.

¡Nin llucha ente pueblos nin paz ente clases! ¡Puxa Asturies!

7 de nov. de 2012

Tirán el Blancu

Ye prestosu ver cuando hai avances na vida d'una llingua, nesti casu del asturianu. Avances anque seya no terrén lliterariu, val bien.

Nesti casu ye la presentación de la obra medieval en catalán por escelencia: El Tirant lo Blanch; anque vertía col títulu de Tirán el Blancu.

Trátase d'una novela de caballeríes, que ye conocida nel mundu hispánicu por tar nomada n'El Quijote, de Cervantes, la gran obra en castellán.

Ta tornáu por  Pablo Suárez García, de xuru seya una bona torna; la edición faise a mancomuña ente l'Academia de la Llingua Asturiana y l'Academia de la Llengua Valènciana.






6 de nov. de 2012

Les noticies "del bable" na Nueva España [Ou un exemplu de la manipulación que falaba na entrada anterior]

Ai, pues ello foi esta noticia. Pero LNE feixo un refritu, ya diou esta outra.





You siempre dixe que, p'aforrar cuartos de la qu'entrara'l Dóberman a pinchar, había que suprimir el BOPA ya da-y esa función a LNE. Tanto diba ser. Pero claro, llegóu'l Dóberman ya pasóu qu'Asturias yía un país mui piquiñín pa la facundia d'unos ya la llozanía del outru.

Conque al delláu miesmu de la noticia del bable, apaez esta outra: "Cherines" nun medróu más porque'l Dóberman diba cuatro pasos por delantre. Poro, con "Cherines" el PP convertirase non yá na tercer fuerza política d'Asturias, sinon al pasu que llevamos na cuarta... ¡¡¡Ya cola Nueva España de sua parte!!!

H.uas, h.uas, h.uas... Que mala "Cherines". Más-y valía metese a actor pa interpretar al malu de Skyfall, na saga de James Bond... ¡el color del pelu ya la cara malu yá los tien!







Bono, pero non, que Cherines nun poudo medrar más ya por eso quedóu asina. Ya asina nós la vemos.

Típica noticia pa rellenar espaciu, tampouco nada nuevu. Ah, sí, ya comentarios, 0. Nengún.




Pero tornemos pa colo de la llingua.

Según la noticia, una asociación venceyada a la Universidá, l'Academia de la Llingua Asturiana [L'Academia Francesa ou la RAE de la llingua asturiana] en comuña col Conseyu de la Mocedá de Xixón organizan un cursu d'asturianu pa estranxeiros.

A estas alturas, depués de 40 años de la muerte na cama del Dictador, esto inda choca na LNE. Ya veo los redactores, fósiles vivientes, que cualquier día van pal Cementeriu p'alimentar urtigas, alzando las manos a la cabeza pol llibertinaxe col que s'aprende l'asturianu anguaño.

Ya touvienon comentarios, éstos, sí. Ya los miesmos comentarios (¡Oh, pardiez!) d'ans xa che fai. De la dómina del xeneralón. Pues bien velehí un casu de manipulación mediática.

Ya inda más cuando LNE sí s'apunta a la subvención por publicar en "bable".

5 de nov. de 2012

La TV Pública... na TV Privada

Paradóxicamente, ayeri nel xenial programa de La Sexta ¡Salvados!, ya digo xenial porque yía de lo más salvable que tien la televisión dientro del Estáu Español, falóu sobre la Televisión Publica; esto yía, de TVE ya las Canales Autonómicas (Públicas), ente ellas TPA.

 Nel programa, lleváu por Jordi Évole, el Follonero de Buenafuente, entruganon a una muyer que taba nel Conseyu de RTVE por IX, a un trabayador de TeleMadrid, a un periodista catalán que trabayara pa TV3, ya a don Miguel Angel Rodríguez, puncha del PP. Falóuse de las privatizaciones de las autonómicas, del TDT Party, de la manipulación innata qu'esiste de la cousa pública nesti Estáu, ya de parcialidá/imparcialidá.

Bono, polo qu'a min más m'interesóu'l programa yía pol modelu se televisión públicu a sacar alantre; ya dientro del nuesu entornu esti yía'l de la BBC,  con tolo qu'ello lleva en sí; ya qu'esto val tanto pa RTVE cumo pa la RTPA.




Pero agora vou falar pa la TPA, que fou de la que nun falanon ren de res.

Foi inconcebible, ya siempre lo dixe, que nos tiempos d'Areces (yá pasanon dos presidentes, ya malapenas un añu!!!)  se dieran partíos de fúbol ya Fórmula 1 que daba, al miesmu tiempu, La Sexta, na TV na que precísamente salía'l programa de Folloneros.

D'esi acuerdu ente'l Principáu (con outras autonomías gobernadas pol PSOE) con Mediapro-Público, salienon todos faciendo fu cumo'l gatu, ya panriba nun amañanon nada productivu (bono, había igual que ver si a políticos ya empresarios correspondientes la cousa-ys fizo bona pro). Pero al públicu xeneral, pouco avíu, dende llou.

Outra, pal casu concretu asturianu, yía dalgo que dixo'l periodista veteranu de TV3: una canal autonómica tien que facer por dar programación na llingua propia, ya non solo lu diz esti peisanu, sinon que tamién dende'l Conseyu d'Europa nas recomendaciones sobre la execución de la Carta Europea pa las Llinguas Minoritarias por parte del Estáu Español (que pa ello firmóu ya retificóu). L'ente públicu de comunicación del Principáu, l'ente públicu asturianu tien que trabayar en ya pol asturianu. RTPA tenía que facer las suas emisiones de Radio, Televisión ya Diariu Dixital n'asturianu.

Ya finalmente, la programación tien que ser de calidá. Independiente de si gobierna l'Home-Llobu ou de si ta'l Dóberman. Ou'l Gochu Fartón. Claro, esto vei tu ya di-ylo al responsable de turnu. Pero asina había ser.

Falando del Dóberman, véuse bien cuando falanon de la privatización de TeleMadrid col muñecu del PP, Miguel Ángel Rodríguez. A min nun me prestaría ver una televisión asturiana en manos del TDT party, dando bomba. Pa eso que se centren en meter perras, si quieren, en TeleAsturias, que tamién volvéu a la oferta de Telecable.

Claro que tamién pa poner el güevu inda ta meyor cuando te lo ponen a preciu saldu cola inversión ya feicha, ya l'ente yá furrulando: Privatización de Telefónica ou venta de Telecable pola Caxa d'Aforros, por exemplu.




El sistema funciona ya'l mundu sigue dando vueltas ya más vueltas.....

1 de nov. de 2012

1 de Payares

L'unu de Payares ye'l día de Difuntos. La nueche d'ente'l 31 d'ochobre y el 1 de payares ye la Nuche los Muertos.

Pa Grau la xente va güei, 1 de Payares, a allumar, esto ye, a dexar veles d'eses coloraes preses. Y cuando escurez al atapecer vense los cementerios allumaos, de color encarnao.

Ye un día prestosu poles lleendes. Les ánimes, y los muetos. Bono, y los antepaos y tola xente que falta. Ye una pena que'l Sistema produciera Halloween, que ye la versión "aséptica" (na que yá se perdió l'alma la fiesta) y standarizada (faise igual en Londres, qu'en Tokio, qu'en Montevideo).

Pues pa esti día ye prestoso esta película:




Que vustedes lo disfruten!

24 de out. de 2012

Un actor políglota

Nun m'alcuerdo qu'escritor, vascu o catalán, dixera aquello de que l'asturianu salvaríase cuando les moces guapes d'Uviéu o Xixón lo defendieren.

Bono, pues esti actor que p'asegún dalguna siguidora colombiana-y paez bizcocho, ye defensor d'esti idioma. Pues por eso lo hai que cuntar, sobremanera depués daquel altercáu que socediera con Diana Navarro nos Premios de l'Academia de la Música; ú, seique, nun fora malintencionáu, pero quedara ehí.

Nada más, ye d'agradecer lo que per otra banda había ser lóxico; y non anécdota. Polo demás, que *William Miller y la so pareya asturiana vivan felices munchos años.



* Velehí la diferencia ente un Gentleman Británicu y un Gracia Noriega.

17 de out. de 2012

El Reinu y la Marquesa

Foi cumo un actu refleixu. Cumo l'activación d'un resorte. Acabar de ller el titular ya un fogonazu...

Ya ello foi por mor d'un actu electoral de la Marquesa Aguirre en Galicia. Aguirre, que yía Marquesa de Nun-Séi-Óu, claro, ella ve l'asuntu dende la perspectiva del Primer Estáu: La Nobleza. Ya, cumo Edimburgo pautóu con Londres un referendum pa consultar si los escoceses quieren independencia ou siguir calteninendo'l sou status quo, ya de fondu ta la custión catalana, hebo que terciar, ya meter el cuezu. ¿Ya ú meyor que nas eleiciones gallegas?

Entós ún, que yía un ser primitivu, decátase que sí Asturies podría pidir a Madrid la independencia, porque demientres bien d'años esto foi un Reinu Independiente.





¡Qué cousas! Nun vou cayer nel mimetismu de pidir la Independencia d'Asturies, porque tampouco me diban poder dicir que non, pola lóxica aplastante qu'usa la Marquesa. Pero, por eso miesmo, cuando se fala d'Autonomías Hestóricas -por exemplu pa espresar el grau d'autonomía, ou pa pasase pol forru dellos dreichos llingüísticos- taba bien recordar esto miesmo.

Paez que casa mal el Reinu Independiente cola Autonomía Hestórica....

8 de out. de 2012

Tapecer la crisis con Cataluña II

Y bono, esta selmana foi'l partíu de lliga Real Madrid-Fútbol Club Barcelona. Y más qu'ello, el choque ente les dos sensibilidaes. Per un llau la catalanista y per otru la españolista.

Dicen que los catalanes, al facer una senyera (que ye la bandera catalana) colos tiffos nel campu al empiezu del partíu, que politizaron l'eventu. Pa nun politizar ta La Roja, supongo, que cuando gana la xente que se viste colos colores d'esa bandera nun politicen, solo politiza la bandera catalana o vasca.

Pero, gracies a les hemeroteques, pue vese esti video:




Digan, ¿y esto nun ye política tampoco?




Na pulsión ente Madrid y Cataluña teo que dicir que, como asturianu, voi más con Cataluña. Sí teo que dicir que toi más coles clases trabayadores que cola burguesía catalana, por supuesto; polo que, como too, al final ye una cuestión ente'l gran capital (qu'esi nun tien patria, anque mueva les banderes) y el pueblu trabayador, qu'esi ta sometíu. Pero eso sí, la identidá catalana ye la desprotexía frente a la española oficial; entós, por tema cultural en gran midida, sí me prestaría que Cataluña toviera'l so reconocimientu.

Dicho d'otru mou, Cataluña ye una nación, y cuido qu'eso tien que tener reconocimentu, ensin que cause -dientro del aparatu de creación d'opinión de la prensa/televisión reaccionaria estatal- más aquello.

Poro, ehí Cataluña ta como Asturies (si bien ellos tán meyor, tien más tradición y fuercia la ecuperación de lo propio). Pero nos medios esos yá tamién Asturies-ys escuez.

Pero nun se dan cuenta de nada, y nun faen por dase -claro ho, tampoco ye lo que-ys interesa nin polo/pa lo que tán-  pero ye qu'esa ye una diferencia ente Asturies y el restu del Estáu -con permisu de les partes de Llión y Zamora y Galicia-.

Y tamién que la reacción nel Estáu Español ye bramente montaraz. Tenemos la drecha más motaraz d'Europa (tanto que nos presta ser europeos) cola escepción igual d'algún país de pal leste.

Pero ehí ta l'asuntu, a LA RAZÓN nun-ys dan perres nin por poner andoya, que ye una palabra asturiana. Tal s'empapieyaran con ella, diba tase meyor y too.

Pues sí, Asturies tien ehí la so llingua, la so gastronomía. Pero tamién tien otros trazos, la so hestoria, les sos instituciones, los sos medios de producción, la so comunidá estable(cida), el so marcu xeográficu coles sos llendes...

Una nación, polo menos dende una perspectiva científica o marxista, si prefieren. Claro que sinon había que gastar por cuenta de promocionar la llingua perres en pagar a Césares Vidales y Jiménez Losantos de turnu; pero...

Asturies ye (o tien los ingredientes pa ser) una nación. Y ello nun ye tan grave. Nun ye pa s'escandalizar tampoco; hai bien d'exemplos d'estaos multinacionales. Ehí ta, dientro del nuesu entornu más inmediatu, el Reinu Xuníu, con Escocia, Gales, Inglaterra ya Irlanda del Norte. Bélxica tien trés comunidades, la flamenca, la valona y la xermana que conformen trés nacionalidaes bien definíes. Suíza ye una república confederal, ú cada cantón ye un mundu tamién...

¿Por qué l'estáu Español, inclusive con Portugal tamién, nun podía reconocer les naciones que lo formen? Ehí taben Cataluña y Asturies, ente otres.




Nel artículu de LA RAZÓN diz que gastar 32.000 € en sovenciones pal asturianu ye despilfarru pa estos tiempos de crisis. Pero toi en que nin ellos se lo creen. Y ye lo que tien la prensa reaccionaria, que tolo meten pol caleidoscopiu d'una supuesta "economicidá" na que too se mide dende una visión marxinalista o utilitarista. Pero cómo dicía, esti ye un estáu con una drecha montaraz. Y ello ye en parte porque  32.000 € pal fomentu d'una llingua minoritaria son un despilfarru, pero una partía de 57.000.000.000.000.000 pa la banca privada, y ensin pidir esplicaciones, ye una midida d'austeridá.




El tema la llingua ye dalgo mui golosu pa qu'heba un nacionalismu. Pero nun había qu'haber talo necesariamente. Ye posible la convivencia ente pueblos de delles llingües vernácules perfectamente. Claro que pa la reacción ye un problema. Y voi esplicalo.

A los señores qu'escaciplen con La Razón-ys la sopla que cuatro vieyos nuna braña metíos y toos analfabetos falen vascu, catalán, aragonés, gallegu, español o asturianu. En realidá, yá que deprendan a lleer l'español yá-ys esmolez. Pero bono. Una persona d'Asturies, Galicia, Euskal Herria o Cataluña sí ye más problemáticu que deprenda (o que s'alfabetiz) na so llingua vernácula. Sí, pue paecer la cosa más inocente del mundu, pero non, amiguinos, el mundu nun da vueltes a lo xo. El problema ye que si una persona tien dos llingües, la dominante y otra que vei espoxinando a seles, yá tien dos canales colos que s'informar (o colo que-y "programar") dende'l poder.

Dicho d'otru mou, la Reacción caltien medios, pero si apaecen canales en catalán, gallegu, vascu o asturianu yá-ys cuesta más llegar a tolos requexinos.

Y agora quién llea esto dirá "Pero home,. que más-ys da, tornan y, como hai perres, espublicen o radien". Sí, pero pasa otra cosa. Asturies tien 1.100.000 persones. Galicia 2.800.000. País Vascu 2.200.000. Cataluña 7.500.000. Pa eses cantidaes ye más difícil monopolizar la opinión pública. Esto ye, ye más difícil facer un grupu de prensa y comunicaciones independiente qu'atrope 46.000.000 millones de persones que un grupu ( o más d'ún) independientes qu'abarquen poblaciones de 2.000.000 de persones.

Y ehí apaecen los Reinos de Taifes -cola axuda inestimable de les cacicaes de turnu-. Pero ye por eso polo que les llingües minorizaes son un instrumentu de veradera llibertá d'opinión, son requexos ú'l poder llega peor, y que realmente ye pa nós, p'Asturies, tener la so identidá llingüística; colo que, pudiendo defender el devenir hestóricu qu'apurríu a esi país una llingua propia, ye tamién y más importante dende un puntu de vista ciudadanu'l caltenimientu de la llingua propia como un obleru de llibertá d'espresión.



*Sobre toes estes custiones, ta acabante espublizase'l trabayu del investigador Patrick Zimmerman "FAER ASTURIES" pola editorial Trabe, un trabayu de mui bona calidá, mui interesante y prestosu.

28 de set. de 2012

Tapecer la crisis con Cataluña (I)

Énte la brutalidá policial na Manifestación del 25-Setiembre; y énte la xuba del IPC (pola xubida del IVA) y la directa perda de poder adquisitivu del públicu común, l'Estáu Burgués Centrlista sigui aporfiando col tema de Cataluña. Tema de da noxu, pol xabón que se tán dando Madrid (col so PP y tol so aparatu de medios ultraconservadores faciendo'l xuegu) y Cataluña cola so CiU, que pa enriba son compañeros de Grupu Parllamentariu Europeu -que son mui amiguinos y, polo menos, mui cercanos no ideolóxicu.





Por exemplu. Nun estáu europeu ensin salida, polo menos nel cortu plazu a la crisis.



Son les autonomíes la bicoca del PP pa esplicar los problemes finales españoles. Que tenemos un estáu d'autonomíes, pero que cuando les gobiernen nun son tanto problema, claro.

Pero bien, neso teo que tar d'acuerdo total col PP. La verdá, ye que yo tampoco creo nes autonomíes.





Pues sí.  Ésti nun ye'l mio modelu. Polo menos pa lo que refier Asturies-Estáu Español. Claro que tema aparte había ser cuála Asturies y cuálu Estáu... Muncha hestoria.


El llamáu Estáu de les Autonomíes ye teorizáu pol filosofu Ortega y Gasset, nel so llibru la España Invertebrada. Venía dicir qu'esiste una organización política estatal fuerte, que dicide les coses comunes de tol estáu -posiblemente él dixera "nación"- y que taba perriba les autonomíes. Éstes furrulaben pa les coses internes, ú l'estáu nun tenía potestá. Pa dientro, pa les coses propies sedríen les autonomíes les que facíen y esfacíen, pero pa fuera, sedría l'Estáu. Dicho d'otra manera, en palabres de Xuan Xosé, la pesca en pedréu sedría cuestión autonómica y la flota d'arrastre sedría tema del estáu centralista, xunto cola marina militar.

Y na II República consolídanse (más o menos) trés autonomíes (dos y medio): Cataluña, País Vasco y Galicia, y digo dos y medio porque l'estatutu de Galicia nun entró en vigor pol Güelpe d'Estáu.

Asturies, sicasí, nun tevo na II República'l so estatutu d'autonomía. Tevo la so revolución y el so Conseyu Soberanu na Guerra, pero nun aprobó un estatutu. Anque sí qu'hebo proxectos, talu como l'Estatutu d'Álvarez Gendín.

Sicasí, ye ésti precedente pa l'aprobación de los estatutos d'autonomía nos años 79, 80's y, pa Ceuta y Melilla 1995.

Pero teo sentío dalgo que de nel sieglu XIX hebo otra República, que precede la II República; y, poro, lleva'l nome de I República. Nesi contestu, hebo una república federal, constituía por Estaos, unos diez pémeque, ente ellos Cuba y Asturies.

Polo que, na hestoria d'Asturies, yá hebo una autonomía, una provincia d'un estáu centrlista, una República Socialista Revolucionaria -anque fora por 20 días-, un estáu, y un Conseyu Soberanu  -con moneda emitida propia y representante énte la Sociedá de Naciones.




Pues sí, hai otros marcos hestóricos, a parte de la relación d'autonomía ente Asturies y l'Estáu Español.

Agora bien, per otru llau, ¿y qué ye una Comunidá Autónoma?

Ye una forma d'organizar un estáu, o dellos territorios d'un estáu, que tampoco ye dalgo sólo español. Italia, ensin dir más llonxe, ta organizada d'una triba similar. Portugal tien dos autonomíes: Madeira y l'archipiélagu de Les Azores.

Una autonomía ye un suxetu políticu nel que se tresfieren competencies, lexislativa y executiva. Poro, n'Asturies hai un Conseyu de Gobiernu del Principáu d'Asturies -ésta ye otra, la nuesa relación hestórica cola Corona- y una Xunta Xeneral -nome heriede de la nuesa tradición foral, como socede en Navarra o nes provincies vasques.

Pero, tamién hai nos estaos europeos de más tamañu, otres alministraciones ente l'Estáu y les entidaes locales.

-En Francia dase un sistema rexonal, más centralizáu, nel que les rexones perden la so cámara lexislativa. Por exemplu, Bretaña nun tien el so equivalente a la Xunta Xeneral, pero tien el so Conseyu de Gobiernu.

-Ta Alemaña, que ye un Estáu Federal, xebráu en Ländern, que son estaos col so gobiernu, el so parllamentu y el so tribunal de xusticia [Cuidaú: nel Estáu Español Xusticia nun ta tresfería a les autonomíes, por más qu'estes tengan dalguna competencia prehí suelta, anque d'eso hai quien sabe d'ello; yo poco]  y ú'l Bundesrat (equivalente al Senado español) funciona como una verdadera cámara federal.

-El Reinu Xuníu presenta un sistema interesante. El Reinu Xuníu xébrase en "Naciones Constitutives" [tamién hai más exemplos, como Paises Baxos o Dinamarca]. Éstes naciones, nel casu británicu, son Inglaterra, Escocia, Gales y Irlanda del Norte; si bien Islla de Mann y les Islles Anglonormandes son dependencia direuta de la Corona. Les naciones constitutivas britániques tienen el so propiu parllamentu, el so propiu gobiernu, el so propiu sistema xurídicu, la so propia organización interior y inclusive la so propia relixón estatal [n'Inglaterra son Episcopalianos (o anglicanos) y n'Escocia son Presbiterianos (o calvinistes)]; pero nun tienen facienda propia; cuando voten los sos presupuestos van a cargo del erariu británicu.

-Y finalmente Italia y España tienen les sos autonomíes.








Agora bien. Les autonomíes sirven para organizar el territoriu, pa organizar les coses internes propies, pa ufrir servicios a la población y tienen una naturaleza política.

Y nesto xurde la siguiente idea: ¿Tien el mesmu xacíu una autonomía p'Asturies qu'otra pa La Rioxa, Castiella-La Mancha o Madrid?

Pues esa sedría la pregunta del millón.

Pero vaya per delantre que los ciudadanos d'Asturies, La Rioxa, Castiella- La Mancha o Madrid tienen que tener, dende'l so sector públicu -y dende la mio opinión- una sanidá y una educación pública garantizaes, ente otros servicios y un sector públicu que, polo menos, -ys axude. Y sí, actualmente, les autonomíes tán, como tol Estáu Español, al serviciu de "Los Mercaos", pero vamos dicir qu'esi ye otru tema, anque bono, más bien ési ye'l Tema.


21 de set. de 2012

¡¡¡.... Pero jode un güevu!!!

Jo, yo la verdá yía que nun teo nin rispiu de clase. Vaya, que nun séi de que vei aquello. Afortunadamente, n'Asturias tenemos a un Gracia Noruega, que yía too un gentlemen. Creo que sedría bon llabor pa un presidente del Principáu, de la que sal escoyíu -pola voluntá popular, of course; buó, cola voluntá popular ya cola bendición de LNE, non cumo'l Dóberman- poné-y un programa na TPA; pero que durara duas ou trés horas pa que s'esplayara.

Pero, callái, callái... porque velehí ta la sua epístola na Fueya Parroquial de la Sumana.

Pero ¡ai! Teo de vos alvertir, pa cuando entaméis lleella: No de que "Ahora que caigo..." nun yía porque nun arrebatu asturianista xubiera a un árbol, sinon que dende que se llee un pouco más, diz que "...caigo en la cuenta..." a mou de reflexón, que pa eso yia un bienpensante.

Fecha esta alvertencia, entama'l batulax de Gracia Noriega, metiendo a España na Segunda Guerra Mundial:


"Ahora que caigo en la cuenta, los «padres de la Transición», eran tan «políticamente incorrectos» (de acuerdo con las alarmas sociosanitarias de ahora) como los dirigentes que derrotaron a las potencias totalitarias en la II Guerra Mundial. Unos y otros eran grandes fumadores. Recordemos a Adolfo Suárez fumando infatigablemente cigarrillos, a F. González con algún purillo, más por coquetería (como los jerséis de cuello de cisne) que por fumador, o a Rafael Fernández con su gran pipa de excelente madera que parecía toscamente talladas a hachazos. Aunque durante la II Guerra Mundial, el que fumaba en pipa era Stalin y los cigarrillos los fumaba Roosevelt, siempre con boquilla."


Non, dime cuenta que yía un error de redacción: F. González yera  (ou podía ser) tan viciosu cumo Adolfo Suárez (polo menos a lo qu'a fumar se refier).


Pero la ocurrencia mítica, yía la comparanción ente Antonio Masip con Roosevelt.... pero llueo pa arreglallo diz que non, más bien con Kennedy...




Y hasta ehí'l primer párrafu. Vayamos -si la Diosa Deva nos da fuerzas- pa col segundu párrafu.




Gracia Noriega establez un paralelismu  ente "progres que llevaban la pipa hace años y ahora no fuman". Ah, la dualidad del Ser Humano... Yía la hestoria de siempres, Dr. Jekyll ya Mr Hyde. Cúmo una persona yía capaz de dar la vida pero tamién de quitalla. Ya cumo un progre entama a fumar ya llou apúntase a un tratamientu pa deixar de fumar. Lo de la reinsección yía una mariconada; un junkie yíalo hasta'l final de los sous días; eso, tea claro, si quier ser coherente consigo miesmu. Lo demás, yia cuentu.



Llou, unas frases más p'abaxu apaez una referencia a ZP. Mirái, Gracia Noriega ya you nun somos xente tán diferente. Él tien a ZP ya you teo las plantaciones d'oucalitu. Pero nel fondu, somatizamos las nuesas carencias del miesmu xeitu. Agora bien, you lo que saco en cuenta d'esti segundu párrafu yía qu'a Gracia Noriega tres las primeras 100 palabras treicionalu'l subconsciente; pue qu'inda you aguante menos.... Pero claro, you sólo soi un progre asturianista.

Eso sí; Gracia Noriega coincide conmigo, al final del sou segundu párrafu, en que al Comunismu  [Estatal ya Nacional] tovía-y queda un llargu camín qu'andar; ya que yía un valor n'alza nestos tiempos de crisis.










20 de set. de 2012

Carrillo, Madrid ya Cataluña






Santiago Carrillo, comunista xixonés de vieyo, morrió estos díes en Madrid. Tenía yá 97 años, colo que yá vivió una vida llarga. Eso sí, dexonos de manera un tanto impertinente, puesto que un día antes, Esperanza Aguirre, marquesa y presidenta de la Comunidá de Madrid, dexaba'l so cargu públicu.

Yo, que vos dicir; a min como que nun me güel bien aquello. Polo del dichu, de que les rates son les primeres n'abandonar el barcu cuando funde.

Y nesto, los del NeoLliberalismu (talo socedió con Rodrigo Rato al mando de Bankia) saben un cachu. Y, depués d'aplicar los sos recortes (a.k.a. "mididas d'axuste", de magar que nun falen castellán, polo del utilitarismu económicu -tán demodé, pero tán aplaudío pola prensa oficial del sistema-) acolumbrase un rescate de la X.E y el F.M.I. que va remembrase na hestoria.


Pues la "lideresa" dexa la política; ella que yera modelu del Lliberalismu Económicu, paladina -pero ¡ai! que nun se diga esconxurada, ¡vive Dios!- del Sistema Capitalista NeoLliberal; ú hai qu'amenorgar el sector públicu pero reforzar el papel d'Estáu autoritariu y centralista [paradóxicamente]. La Marquesa, que quixo privatizar TeleMadrid, y el sistema d'agua de Madrid; la mesma que llenaba la bocona con palabres en defensa de la sanidá y enseñanza públiques, pero que quitaba a lo público pa-ylo dar a lo privao.

A min, qué vos voi dicir, nun me presta nada.




Y per otru llau, ta Cataluña. Pa quien nun lo sepia, ye una comunidá autónoma rescatada.

Vaya frase tonta y probe...

Buó, Cataluña, vivió allá atrás la Diada, la so fiesta nacional. Y hebo una fola de manifestaciones pola independencia.

El presidente de Cataluña llámase Artur Mas. Ye un puntu que paez ente Rajoy y Javier Fernández; a min polo menos paezme que con esti últimu dase un oldéu... más que sospechosu.

Artur Mas ye President y militante (o por gastar un nome más acordies col so partíu) afiliáu a Convergència i Unió.


Yo, qué queréis que vos diga. A min eso paezme una versión catalana del PP, qu'eso sí, falen catalán, y eso, pero...

Non obstante, por min Cataluña puede independizase, si quieren. Pouco va cambiar la cosa; yá lo dixo Artur Mas, van siguir perteneciendo a Europa -supongo que tamién al Euro- y van sigur mandando los mesmos; va siguir la rapiega curiando los cordeiros. Colo que lo mesmo te dea joder de bruces que facello d'espaldas.

11 de set. de 2012

Pequeñes entidaes pequeñes

Les entidaes menores, que n'Asturies correspuenden a les parroquies civiles, o a lo más ochenteru Parroquies Rurales, pero qu'ún y otru correspuende a la vieya organización del paisaxe nacional.

Venceyao, quiciabes, al predominiu de la Ilesia n'Asturies medieval, güei son erbíes perfectamente válides pa un modelu d'autoxestión, desendolcu sostenible y democracia popular, que, pela cueta, quier el gobiernu central español del PP desaniciar.

Sedría inxusto dicir que sólo ye un ataque al paisaxe y al pueblu asturianu. Nes tierres lleoneses son les sos entidaes: Juntas Vecinales; pero tamién pa Cantabria, Galicia, Castiella, Aragón, Navarra... y de magar más.

N'Asturies ye la parroquia. Cola so Xunta, formada polos vecinos, el so alcalde (de barriu), los sos vistores (en cada aldea de la parroquia), el so Llibru d'Actes de la Parroquia... heriede d'una organización medieval, sona a l'Asturies que foi Reinu; pero qu'anguaño nestos tiempos de crisis, llántase como alternativa a la concentración de poder del Estáu Centralista Neolliberal; proponiendo un modelu d'autoxestión más eficiente y participativu. Y un bon preséu pa caltener xente nel campu, pa frenar el despoblamientu.

Nel Estatutu prevése la so formación. Y na páxina del Principáu pue tamién siguise'l so desarrollu. Que nun foi tolo esperable, pero ehí ta. Na vecina Galicia constituyénonse, d'un xeitu similar, 9 parroquies.



Pues bien, dende Madrid (qué tolo saben) quieren matar esta institución d'autogobienu porque-ys paez cara. Pero bono, al PP tolo que sía caciquismu, ventayina pal fuerte frente al débil, y mangonéu, bien-ys val, pero esto otru nun-ys paga la pena; porque nesta institución los vecinos tán cara cara, reuníos de frente; y non dende un despachín nun Ministeriu aisllaos del Mundu.

Polo visto l'autoxestión y el desarrollu sostenible nun entra n'Axenda política del Neolliberalismu, d'esti capitalismu xabaz.

Ye otra repuesta contra la democracia, falseando y falseando; sobren conceyos y (agora) parroquies, pero falta EuroVegas ya BarcelonaWorld, coles sos desregulaciones en materia sanitaria, llaboral y demás.

¡Cuánta tán arrapañando col tema la Crisis!

9 de ago. de 2012

Roubar a los probes pa da-yslo a los ricos

El personax de Robin Hood basase nuna tradición, más ou menos xuglaresca, de la parte Inglaterra.

Nestos días, xente del sindicatu CUT-BAI, n'Andalucía, entranon nuna tienda d'una cadena de supermercaos pa garrar (ensin pagar) alimentos básicos pa da-yslos a los probes.



 Bono, ya ehí taba Sánchez Gordillo...



A min, pueo tar sintiendo esta entrevista 20 vegadas, pero siempre me da pena del periodista. Probín. Pero inda me da más pena del que-y manda "morder". Ési, si duerme, yía pa facer un estudiu sobre la maldá humana.

La familia Roig tien que se sentir espropiada.

Teo, cumo tanta xente, conocíos nel miou entornu que tán al vies de quedar sin seguru médicu (públicu).

Supuengo que prehí vei la cousa.

Pero con todo, you tou con Sánchez Gordillo ya los sous compañeiros. Más xente asina fai falta.

2 de ago. de 2012

Na presentación de Xurdir

Pues sí. Yá por fin Llión (con Zamora) mueve ficha, no que refier a la recuperación llingüística del idioma que va dende Peñes al Douro.

Y nun foi fácil. Más que nada porque, si nos otros dos territorios [Asturies y Miranda dl Douro] les compilaciones ortográfiques o gramaticales del asturllionés local asoléyense con cuartos del erariu públicu (lo normal y lóxicu en cualquier país medianamente civilizáu), en Llión la gramática, llamada Xurdir, failo gracias al llabor d'una asociación, Faceira; lo cual diz muncho sobre la calidá de les instituciones llioneses y del so nivel cultural, si nun fora pola ciudadanía d'esa tierra.

A parte de la Gramática Asturiana de l'ALLA y les Normes Ortográfiques, yo yá tenía los Elementos de Gramática Mirandesa de Moisés Pires; pero ente'l Douro y Payares aínda nun había nada escrito. Y ello ye, en gran parte, pola desidía de les instituciones llioneses (o castellanollioneses) que gasten cuartos en facer una ruta temática del castellán, o en mirar ver si -metanes sesudes pseudoinvestigaciones- el castellán nació en Castiella y Lleón o (en total xermandía) Cantabria o La Rioxa.

Tevi'l placer de tar na presentación cola xente de Faceira, y otros amigos d'Asturies y Miranda dl Douro [Estos non taben de cuerpu presente, si bien lo hai que dicir] y na presentación de Xurdir inxerta nunes xornaes sobre la llingua llionesa organizaes pola asociación El Teixu, falóse sobre la nula sensibilidá (y cuando digo nula digo CERO) que tienen les sos instituciones pol idioma. Arriendes d'ello, dase la paradoxa de que'l gallegu (llingua tamién propia de Llión y Zamora) tien un status reconocíu, qu'entá siendo insuficiente,  ñegase-y al llionés, nun actu de clara discriminación, na que yá nun se discrimina frente a la llingua oficial del Estáu Burgués (y del rei) sinon frente a la otra llingua minorizada.

Pero asina tán. Meten perres pa promover un proxectu pseudocultural-turísticu mentres la llingua llionesa s'estingue y la gallega corruempe...



Xurdir ye una pequeña guía gramatical-ortográfica del llionés. Y ye verdá, chándo-y una mirada, vese que falten dalguna cosina. Pero eso sí, quedó llonxe tol trabayu internáuticu, pintorescu por otra parte, de Conceyu Xoven, porque cola mesma mirada vese qu'eso sí ye llionés del bono... Xurdir ta fechu con muncho procuru, y d'ehí vese qu'hai yá una ferramienta afayadiza, que ye un poco la so función, p'arimase ya dir deprendiendo llionés. Creo que, como complementu a esti manual, había que practicar el llionés oral nos pueblos ú entá se caltien meyor la llingua.

Dicir que ye coherente pa cola unidá del idioma, y que sigue la ortografía propuesta pola ALLA, pero basándose nel falar popular llionés, y sobremanera nel dialectu occidental, mayoritariu nes tierres augustanes, si bien toma como modelos el falar Pal.luezu de L.laciana (y alredores) y el falar de Cabreira, pal sur de Llión.

Pero vamos, que pa dalguién del Occidente d'Asturias cumo you nun hai muncho más aquello... Ya qu'amás, cumo recueyen dalguna cousa más, a min chocoume rasgos que tienen pa la parte La Forniella, en palabras cumo Mañanha o Chenha o Penha, ya que me paecen los rasgos más diferenciaos que pueda haber col llionés d'Asturias, polo menos a lo que l'Occidente se refier.

Na presentación quedaron pendientes prósimes ediciones, colo que'l conteníu dirá enanchando; siguiendo per otra parte, un camín lóxicu pa esti tipu d'obres (les propies ediciones, cambios, aumentos inherentes a cualquier compilación gramatical de cualquier llingua).



Buó, respective a les Xornaes, a min prestáronme abondo. Hebo música tradicional de la Tierra, con Fran Allegre, que paga la pena conocelu, ye luthier y amás tien un discu con añaes tradicionales, siendo'l primer discu llionés en tar espublizáu íntegramente n'asturllionés.

Emocionante foi, dende Zamora, la presentación del poemariu Llogas Carbayesas del profesor Oria de Rueda. Polo visto, el tal poeta ye toa una institución nel mundu la bioloxía, y especializáu en temes de micoloxía. Pues facía tiempu que nun vía a un paisanu fechu y drechu emocionase tanto, y amás pol llionés... ¿Habrá futuru pal llionés anque les instituciones castellanollionesas nun amuesen ren d'interés? Sintiendo esta conferencia -y les xornaes en xeneral- sólo queda dicir que la Junta-de-CastillaLeón lleva les de perder...

Les otres ponencies yeren la presentación d'Onde la Palabra Pousa. D'Asturias a Miranda: Crestomatía del asturl.liones occidental, fecha por María Viejo y Xulio Cueto.

Con esi nome, a lo primero, yo tuvi de mirar qué significa crestomatía, porque claro, yo soi una burrina. Y dende que lo vi, ehí dime cuenta "¡Ei, por eso qué bien-y vien esi nome al llibru!". Y ye verdá, porque ye una crestomatía totalmente [Si nun sabéis que quier dicir crestomatía miráilo na wikipedia, como fice yo...]

Xulio Viejo lluego dio una conferencia sobre l'Asturllionés na Edá Media, que prestó, prestó bien.



Pero de Xulio Viejo yá sabíamos que yera un filólogu importante, y María, por supuesto, tamién.

Lo que sí, ya más importante (porque a los de casa.... ya los conocíamos) los que nos fixenon sentir cumo en casa a los que fumos participar ya los qu'organizanon todo. A Ricardo Chao, a Balbuena, a Alfredo, a Fran, a Teresa, a la rapazada d'Agora País Llionés ya a tola xente que touvo ehí ya igual agora nun me recuerdo, pero sobre todo, pola sua amistá ya por ser gran promotor, defensor ya estudiosu ya tolo que se pueda dicir del llionés-asturianu ya pola sua hospitalidá ya pol sou desinterés, a Nicolás Bartolomé. ¡¡¡Vida Grande pal Llionés!!!

6 de jul. de 2012

Anuncios n'asturianu

Por outru llau, ya nun lo atoupo, pero pienso que tea na antigua Mazana Mecánica, nos archivos "rescataos" de cuando s'espublizaba nel Nireblog, pero ficiera una entrada sobre anuncios en galego.

La verdá yía que sou fan de los anuncios de Supermercados Gadys, que son una cadena galega, l'equivalente al Único que se vía por Asturias.

Pouco a pouco, ya cola chegada de RTPA, n'Asturias fou apaeciendo dalgún anunciu televisivu customizáu al ástur.

Pues entamóuse colos anuncios de l'alministración, ya especialmente los de la toponimia.



Llou, nel ámbitu de la cultura, foi l'anunciu de la editorial Trabe:



Bono, ya hebo tamién anuncios de la programación n'asturianu de la TPA:



Pues agora, una empresa asturiana d'hostelería ya alimentación, asoleya una campaña publicitaria dafechu n'asturianu:



Arriendes d'ello, tamién na miesma sumana'l centru comercial Caudalia de Mieres sacóu una campaña publicitaria nesta llingua.

Colo que pouco a pouco'l camín vei andándose.


27 de jun. de 2012

Chapapote en Carreño




Xa somos un pouco más parecidos a os nosos irmaos d'Occidente, os galegos, porque xa temos el noso chapapote, anque por mor del idioma, aquí vai ser "Galipote". Peró a sustancia é, a os oyos, idéntica ou muito someyada.


Se falamos da política en Carreño, eu sempre que paro conos partidos d'esquerda nese conceyo -y polo tanto asturianistas- elos sempre se quexan de cómo atacan el medio ambiente. Porque xa as industrias contaminan, como pra nun tomar máis precaucióis.

Pero non, porque é el noso modelo de desarrollo económico, aquí conto máis ataque al medio ambiente, conta máis agresión al verde, vamos progresar máis: y xa nun digo nada nestos tempos de crisis coa dereta máis salvaxe desregulando y recortando....

Conque ánimos ás xentes candasas, porque van precisarllo, y máis a toda a xente que vive (y ama) a mar.



Eso sí, agora a caciplada del momento éche el EuroVegas que -como nun poudiera ser d'outro xeito- ven amadrinao por Esperanza Aguirre (ou A Cólera de Dious) porque vai trer milentamil postos de trabayo, y esto vai ser unha tremenda sorte que nos a veñan poñer.

El Entertaiment, hoi que xogan Portugal y España, os dous únicos estados del mundo únde se fala galego y asturiano. É fubol, peró a min se me preguntan diréyes que vou con Portugal, porque aí el galego ta normalizado ben, y el asturiano (daquela maneira) xa é lingua oficial da República.

Polo demáis, portugueses y españoles, primos irmaos rescataos.... E força para Portugal!!!

20 de jun. de 2012

"Lengua aragonesa propia del área oriental de la comunidad con sus modalidades lingüísticas"

Esta noticia vien d'Aragón. Ye sobre la Llei de Llingües d'esa comunidá.

Pero n'Aragón, la reacción, formada pol PAR y el PP, echa p'atrás la denominación de "catalán"  y de "llingua" (por "modalidá llingüistica", y la primera por "llingua aragonesa propia del area oriental").

Eso suéname tanto a lo del gallego-asturianu.... Qu'agora ye eonaviegu... y si non fala del occidente...


Pero ye la hestoria de siempre. El "divide y vencerás". Actualmente dentro del territoriu peninsular del estáu español esisten 7 llingües, a saber:

-El gallegoportugués (pero que pa Galicia y Castiella y Lleón va ser gallegu, p'Asturies Gallego-asturianu y pa los territorios fronterizos va tener, asegún, dellos nomes.

-L'asturllionés: asturianu o llionés.

-Vascu.

-Aragonés.

-Aranés (occitanu).

-Catalán (pero pa Valencia valencianu, y p'Aragón llingua oriental).


Val. Si namái fora'l nome, entós tanto daba. Pero tres el nome, como siempre, hai otres coses. Y son coses como'l francimientu del troncu llingüísticu por mor de les llendes y les alministraciones polítiques, la diferenciación entre llingües (en base a una idega política), y l'aisllamientu de les variantes llingüístiques dientro de los diversos territorios, en base otra vuelta más, a un criteriu puramente políticu.

Colo que la diferencia ente catalán y valencianu, ente asturianu y llionés, ente catalán y "llingua oriental aragonesa" o gallegu, portugués y gallego-asturianu básase nun criteriu políticu más que n'otra cosa.

Pero ¡atención! Aquellos miesmos criterios usaos pa xebrar catalán en valencianu, catalán y llingua oriental aragonesa nun sedrán válidos d'aplicase cola sétima llingua peninsular del estáu español: El castellán. Esi nun conoz de dialectos nin de fragmentación, por más que tea por ver si un porteño se pueda entender con un mexicanu o con un malagueñu, castizos, esos sí.

Poro, equí volvemos tener otro criteriu políticu: el castellán nun conoz d'eses xebres autonómiques. El falar andaluz ye'l mesmu que'l falar murcianu, l'estremeñu o'l de Madril o Valladolid o Palencia. Pero, posiblemente, la distancia dialectal real, esto ye, puramente llingüística, sía mayor qu'ente un falante d'Alicante y otru de Xirona.

Buó, la hestoria de siempre. Asina qu'amiguinos, hai qu'andar aliellos col tema ésti llingüísticu tamién, que non too ye pensar na situación colonial que s'avecina a España (y Italia... y como nun tean agora sollertes, Francia).

11 de jun. de 2012

España rescatada

Pues ehí lo tienen. L'estáu Español ta interveníu -vía sector bancariu- pol FMI, el BCE y la XE.



Equí los neolliberales tienen que tar que nun-yos cabe un garbanzu más en culu, puesto qu'agora España ta en manes del mercáu dafechu, y con ello la so soberanía. Nunca tevo tan en manes de la economía capitalista.

A partir d'agora la llamada "mano invisible" va empezar a andar y vamos ser muncho más felices. Ta guapo aquello de ser interveníu.

Y bono, más que nada, agradecer la xestión eficiente de los gobiernos socialistas y peperos. Sobremanera a Aznar, qué sedría l'Estáu Español ensin él.

Y, panriba, tán ehí Fernando Alonso, Nadal y la Selección Española de Fúbol ganando títulos a mansalva. Tamos, como diríen los economistes, nuna situación óptima.

A ver cómo acaba la cosa.

4 de jun. de 2012

Desanse en paz





Nun yía que la lletra sía mui allá, pero ¡ai la voz!

Asina yía que desque la xubienon a la rede esti tema touvo gran éxitu. Puede que nun sía la mayor amuesa de técnica de la música [cousa que desconozo, puesto que you nun séi música], pero a min recárgame la batería de bona enerxía positiva.

Eduard Khil foi un barítonu sovietu, galardonáu con dellos premios ya, depués de la caída de la URSS retirárase, pero en 2010 xubienon a la rede esti video ya algamóu fama mundial.

Yía una canción simpática, ya MrTrololó tamién siempre presta, pola sua simpatía.

Pues la mala noticia yía que Eduard Khil morréu güei. Una pena.


31 de mai. de 2012

Un municipiu pa fusionar

Guijo de Galisteo ye'l pueblu típicu español que pueda apaecer nuna pelicula d'Almodovar o nuna novela de Miguel Delibes. Ú tanto se podía rodar Bienvenido MrMarshall que La Escopeta Nacional. Nun sé, el pueblu de la España interior d'aquello que llamen "provincies".




De nun ser por esta noticia, de xuru que na mio vida sentiría falar d'esti pueblu, que dientro del "nuesu orbe" llembra un poco a Sendín, en Miranda dl Douro.

Bono, sentimentalismos aparte, Guijo de Galisteo nun tien un chavu y polo que tán debatiendo ye por si soltar nes fiestes los toros o si pol contrariu apoyar una partida destinada a ufrir trabayu temporal.

Que nun tengan perres nun ye reprochable, por que ¿quién les tien? ¿Úles? Non, equí n'España van pa la Banka pa que xubilen a Rato y a otros grandes economistes y financieros. Polo que dende esi puntu, nun-ys hai nada que reprochar.

Lo que-yos queda ye un poco acabar col "pan y circu", y pa esti casu, los toros. Y andái sollertes, porque pueda ser que los toros de Guijo de Galisteo sían la imaxe del fúbol profesional no que vien siendo'l restu l'Estáu.

Y bono, l'alcalde de Guijo -que paez que tien más xacíu que tola gandayada que ta puesta de banqueru o gran políticu d'altor- quixo que fora la xente'l pueblu la que decidiera. Y polo visto l'estremeñu vieyu pide trabayu nantias que toros pero l'estremeñu nuevu diz que más-yos val toros, porque entós vien la xente forano y entós tamién s'incrementa'l consumu nel pueblu.

Como ésti ye'l mio blogue voi dar la mio opinión: Esto que-yos lo entruguen a la xente de Grecia (país turísticu por escelencia) y de Suecia (país non turísticu y tradicionalmente con altes tases d'empleu) a ver qué val más, si facer fábricas o hoteles [diba escribir otra cosa por hotel, pero nun la vo poner]. Grecia tien ruines, clima, gastronomia, tradición... Suecia tien que se conformar cola Saab, la Volvo, la Scania, la Husqvarna, Electrolux, Ikea, Ericsson, Alfa Laval, H&M, Skandia...

Bono, y xenial les ruines griegues. Que les caltengan tolo meyor posible ensin construíles, o como se tengan que caltener. La tradición griega cal tanto o más qu'IKEA, la Gastronomía de Grecia nun se sabe tolo que val... al clima ún faise. Pero si'l gobiernu nun fomenta l'empléu y sólo tira poles fiestes...

Conque vamos ver. Yo -que teo blogue, y por eso opino, y el que non, que faiga él ún-digo que más-yos valía votar pol emplegu. Si non, lo qu'había que-yos facer a los de Guijo de Galisteo yera -si voten toros- fusionallos con otru conceyu d'esos qu'hai por Cáceres, y depués de la votación, que gasten los sos cuartos n'emplegu.

Esa fórmula Inversión=>Turismu=>Construcción=>Emplegu=>Consumu=>Cuartos=>Inversión, vuelta al círculu vicisou... Había que la dir revisando.

29 de mai. de 2012

Faen bien!

Pues yá tenemos n'Asturias las conseyerías más ou menos axeitadas. Col Lobis-home ehí mandando. Sí yá lo dicía you...

Bono, pues nada, agora yá vei empezar lo bono: Lo que-y quedóu por facer al Dóberman, tol tema los recortes. Ya ésti puntu que vei gobernanos vei facello bien nesi sen.

Pero nada, pola mía parte encantáu. Hai que-y dar bien de millones d'euros a la Banca pa que los banqueiros se retiren con pensiones que nun las ganan ente'l sumatoriu de lo que gana tola población total de Conceyos enteiros por añu.

El gobiernu d'España ta por acabar cola educación ya cola sanidá públicas ya privatizar, pero you toi en que lo que tenía que privatizar yera precisamente la Banca. Ya entós ellos diran: "Yá, pero si la Banca vei a la mierda, entós la xente tamién". Pero había que-ys dicir: "Sí, nós veimos dir a la mierda de tolas maneras, pero polo menos dalgo más vei quedanos... cultura, seguridá, futuru....". Ya entós yá veríamos.

Nesti país yá s'alzanon agora los mineiros. Porque yá van tando fartuquinos ya, bono, de llucha saben abondo.

Pero'l Llobeiru ta en gobernar en sintonía con Madril. Lo cual nun taría mal si ehí touvieran civilizaos, pero non, son más bien montunos.

Conque ehí había dase una forte contradicción. Pero non, el Llobeiru tien mirar torcíu, ya un gustu tamién mui aquello pol autoritarismu que vei ¡ai, si nun fora que tolos palos llou caen siempre a los miesmos! diba prestar.

Arriendes d'ello, ta tol tema del perfil xacobín que lleva metíu na mollera l'home esti, ya que tanta tinta tien sío impresa colas suas arrancadas.

En tema de trabayu you tampouco séi mui bien qué vei pasar, pero tampouco soi especialmente optimista. Claro que polo menos vemos tener un gobiernu estable capaz d'aprobar unos presupuestos.

Bono, pos díbamos rinos bien, si nun fora que, cumo dicía más arriba, tolos palos-ys caen a los de siempre [¡A los que lo cuecen que nun-ys pasa nada.... !]

23 de mai. de 2012

N'Inglix plis

Toi viendo pela rede una entrada d'un blog que me manden al corréu.

Pero claro, aínda sonen nes mios toreyes esto:


Ye prestosa esa imaxe del español intentando falar inglés. Y esi preste del billingüísmu español-inglés que nos va abrir les puertes al mundu, puesto que l'inglés ye la primera llingua y l'español la segunda... pero medrando. Pero claro, falar inglés... ye falar inglés, con tolo qu'eso lleva.

Por exemplu, la mar Cantábrica (nes español mar Cantábrico) ye n'inglés Bay of Biscay... pero en francés yá ye  Golfe de Gascogne.

Ye la mesma cousa, pero pa los falantes d'una llingua ye una mar polo del matriarcáu, pa otros ye lo mesmu, pero en masculín polo del machismu mediterraniu, pa los anglosaxones ye una bahía y pa los francesonos ye un golfu. Unos referéncienlo a un pueblu prerromanu, outros al vascu, y otros a una rexón occitana.

Pero la mar ta ehí.

Siempre dixe que cuando a los neños-ys aprenden inglés o francés (daquella) con ello tamién-ys aprenden otres coses. Col inglés tán por metelos nel mundu anglosaxón y na orbe cultural del Imperiu, y cuando s'estudiaba francés, na órbita cultural (con too aquello que lleva) francesa.

Y claro, coses como estes a min danme muncho qué pensar, y toi seguro que nun ye tan importante saber la llingua correctamente como eso otro que lleva arimao, pal casu del inglés la mentalidá capitalista lliberal moderna que s'apalpa nestos tiempos.



Bono, y llueo tamién ta'l Tajo, pero que n'inglés ye Tagus, porque vien del llatín o'l mal usu de "the aragon jota" cuando había ser "aragonese jota".




Bono, pues si, finalmente, esto sedrá'l billingüismu inglés-español o meyor dicho espanglish-español d'aquella manera que nos ponen como contradicción pa deprender l'asturianu, nun paga la pena refutar esa incompatibilidá. A nun ser pa facer la gracia:

-Yes, sí ho, tu yes mui grande... You're big! Qué gallu yes, You're a cock. I like study english beacuse is a big languaje que help me to work and travel around the worl... empezando por Grau.

Fúbol y Política

Lleo na prensa dixital que l'atacante asturianu David Villa nun va poder llegar a la Eurocopa por mor d'una llesión. Ello yá constitúi una noticia importante pa la prensa, y de xuru que sía bian paroliao perende.

Y, como la final la Copa'l Rei va xugase esti añu ente l'Athletic Club de Bilbo y el Fútbol Club Barcelona, la Marquesa salió esmolecida (y esmoleciendo) porque nun-y encartia que-y piten al Rei.

Con total humildá, pero con tol alma, toi seguru que nun lo fai porque quiera despistar pola intervención de Bankia, con un total cerca de15000 millones d'Euros; sinon porque con eso de qu'ella ye la nobleza, entós-y estorba.

Dende Cataluña y el País Vascu les voces nun son de parabienes. Pero qué más-y dará a ella. Eso si, presta la rempuesta que tien el so collaciu de partíu, Basagoiti, cuando fala de les banderes preconstitucionales que se ven nos campos de fútbol de Madrid (Real Madrid y Atlético... supongo que nel Rayo menos, y nun sé nel Getafe).

Pero ye qu'esto ye España. Equí ta meyor mirao ser falanxista (o ex-falanxista) que republicanu.



Esti fin del selmana pasáu -y esto yá nun lo dixenon los Mass Media provincianos- foi la cellebración que faen pa Les Arriondes (creo que ye pa Les Arriondes o pa Cangues d'Onís, nun sé ú, pero pal Oriente) na que remembren la muerte d'un Rei, Favila, por un bardión.

Esti añu, alcordánonse del compañeru elefante cayíu n'actu de serviciu, y honranon -na fiesta republicana- al collaciu Urdangarín por facer por traer la República y baltar al Borbón.

Velehí la reseña nel BOPA.


17 de mai. de 2012

De aquellos barros, estos lodos

Bueeeeeeeeeno. Pos, cumo quién nun quier la cousa, tán yá eiquí. Son la versión 2.0 del Arecismu, agora con UPyD vestíu de monu-apuntando-con-una-ballesta...

Son la F$A col sou apéndiz, IX, un pouco a lo Osu Yogui con Bubu (cumo la campaña pal turismu); pero si la F$A yá pecaba de partíu centralista, ya precisamente'l Llobeiru yera l'obleiru del Xacobinismu más irracional, agora na sua versión 2.0., con la Neña del Exorcista, entós yá yera lo que faltaba.

You pensaba qu'eso n'Asturistán nunca na vida diba trunfar teniendo yá a la F$A, pero cuando vi falar a La Neña del Exorcista con Rosa Díez (paecen Mari Carmen y Doña Rogelia) entós la sensación foi cumo si touviera'l cuerpu llen de drogas psicodélicas. ¡¡¡MÁS CENTRALISMU P'ASTURIAS!!!

Ya métense col tema de las circunscripciones electorales, porque claro, taba guapu falar n'Asturias de discriminación llingüística. Pero agora yá toi intrigáu, cuando llegue la prósima Selmana Les Lletres. Esti añu dedicada de xuru a Amigos de los Bables, ou a dalgo d'eso.

En fin. Cumo diz el cantar, esto ye Asturies.

Ya de la qu'espublizo esti insiertu na mia bitácora na Nueva España (tenía quer ser el nuevu BOPA p'aforrar n'edición ya en papel) sal, col entregu que tien esti mediu pola Corte -non pa los gochos, sinon la del Borbón ya la reciella- pola noticia: Asturias vei ser intervenida porque l'estáu de las cuentas públicas yía una comedia.

Normal. Cumo dicen por Madrid ya toda Castiella, de aquellos barros, estos lodos. Ya asina yía. Cascos, por muncho qu'él diga ya la xente lu almire, Cascos digo, yía un desastre que na sua vida pegóu palu al augua ya que vive ya vivíu del cuentu. Infrastructuras proxectalas con cuartos hasta'l miou vecín de baxu que va a sexto de primaria.




11 de mai. de 2012

Collaboración Interautonómica: Melilla ya Asturias

¡Quién lo diba dicir! Dende Melilla, la ciudá hispanoafricana a Asturias, el país atlánticu.... Xuntos por mor de cuarenta mouros que morrienon cuando la guerra, ya que taban meyor enterraos llonxe d'Asturias...

Bono, el casu yía qu'Asturias tien -cumo tol restu del estáu- un monumentu mouru; así qu'así'l nuesu data del sieglu XX ya non del tar nel medievu de los Taifas ya Reinos Mouros, porque n'Asturias non houbo; eiquí cumo muncho houbo un gobernador, pero que pouco duróu....

Buó, eso foi hestoria.

De la guerra queda, curiosamente, el cementeriu musulman que construíu Franco pa enterrar a los soldaos musulmanes. Cumo cousa hestórica, ta bien, anque si Franco nun trouxiera nada tampouco pasaba gran cousa...... Non, valía más entós.

Pero yá que lo tenemos, hai qu'amirar por ello. Claro que, tán ehí los monumentos catoliconos del Reinu Asturianu, ya ensin ser yá reinu, de la dómina medieval, ya dientro d'estos últimos pal occidente tenemos el Monesteriu d'Oubona ya'l de San Salvador de Corniana que yá piden -a glayíos- una restauración urxente.


Por embargo, Melilla, ufríu a axudar a las xentes de Barcia a caltener el sou cementeriu Mouru. Ya digo you qu'igual taba bien, nestos tiempos de crisis, p'arrexuntar ayalgas ya tesoros... ouru, que viennos bien...

¡Bravu! Melilla yía'l nuesu focu pa los asturianos de relixón musulmana. Son un pouco cumo la Santina, pero pa la xente d'Alá, qu'a los asturianos guía.

Esto yía una cousa guapa, esta collaboración interautonómica ente alministraciones: la autonómica de Melilla cola local d'una parroquia asturiana... ¡Qué pena que nun heba cuartos pa todu! Melilla agora yá, col tema la crisis, nun se vei poder facer cargu, así qu'así, vei pagar pal sou caltenimientu, supuengo qu'a daquién que-yslo siegue [cola desbrozadora] ya qu'esveire p'ente las tumbas ya las murias.

You nun conozo datos sobre la población musulmana n'Asturias, pero taba bien -pa cuando morran- enterrallos ehí, ya asina aprovechar esi cementeriu... inclusive los qu'hai pol país, que son dellos, pa los protestantes. Asina taban n'usu, ya tarían cuidadinos... Porque eiquí cualquier día vemos a un responsable, por dicir, de Besuyu falando con David Cameron pa ver si-ys meten unas burras siquiera que-yslo pazan... ou bono, si se volve enterrar los muertos, a daquién que-yslo esveire un pouco.


10 de mai. de 2012

¡¡¡Viva Rodrigo Rato!!!

San Rodrigo Rato, el magu de les finances n'Españistán.

L'home que tenía que llegar a presidente d'Asturies; del Principáu. El bienqueríu polos asturianos conservadores. Bon, d'esi asturianu castu, qu'amira pa la Corte con güeyinos, y que vive en concordancia cola Santa Sede (Rexa y Relixosa).

Rodrigo Rato, artífice -ente otres persones- del Milagru Español -con crisis de lladriyu incluída.... bono, non la Crisis foi por mor de ZP-, Director del FMI -metanes la Crisis Financiera Mundial- y gran economista español, d'orixe asturianu.

Gracias a él, y col beneplácitu de la Marquesa Esperanza Aguirre, los súbditos de la Corona (los mesmos reis que tán en función continua) vamos pagar el rescate a Bankia.

Epitafiu chocante pal mayor impulsor de las lliberalizaciones. El gran axioma del NeoLliberalismu: "Lliberalizar ganancias, estatalizar perdes... Fortalecer les grandes finances, y arrañar los drechos consiguíos y les poques perres a los probes".

Y digo yo ¿habrá que lu indemnizar bien? De mano yá se fixo cargu de Bankia un ex-directivu de BBVA indemnizáu con TRÉS MILLONES D'EUROS de despidu.

Toi ansiosu porque faigan más recortes a los paisanos y paisanines, porque daquién tendrá que pagar les ventures y desventures d'esta probe xente (los Rato, Esperanza Aguirre, Goirigolzarri

23 de abr. de 2012

10 meses ensin presupuestos




Güei chei mui güeyu a la sesión matutina de la Xunta Xeneral, ya sí ví aquello... ¡¡¡Ya bien me prestóu, qu'inda penséi que, polo menos, yera cousa aburrida!!!