21 de fev. de 2012

Güelpe en Valencia y Reforma Llaboral

Sabino Méndez ye directivu de la SGAE, pero güei, entá día de la llingua materna, destácase con un ataque veláu a la llingua asturiana.

¿Pa que se va contestar si la mafia la SGAE tien abondo pa sí?

Pero bono, estrayendo la sentencia de so: El ejemplo siempre es el mismo: “el premio a la mejor canción en bable no es muy seductor”.

Yo digo qu'hai que ser mezquín pa xustificase neso. Claro que nu van pagales cola viaxe al debalu nel que ta metida güei la calidá de la música comercial del estáu. ¿Por qué n'ú quedó OT y toa esa telebasura? Por nun falar de la dexeneración del cantar del branu.

La calidá de la música comercial española ye perbaxa, y ye de mui mal gustu que Sabino Méndez vea'l problema "no de siempre".


Y n'otru orde coses, la policía ayer en Valencia actúo de manera irresponsable al cargar contra manifestantes estudiantiles. Y, al entrugar a los polis, ellos dicen que cumplen colo que-ys manden darriba.

Conque'l problema vien de los mandamases en Valencia del PP.

Son la lluz que va guiar el destín del restu del estáu gobernáu pol PP. Dame muncha moleición...

Mentres se topaben na oposición, el PP glayaba a l'alta la lleva contra toles coses, y la drecha, dende que gobierna -y equí puede metese tamién a Cascos- ca cosa que toquen... mete miéu.

Cola reforma llaboral da yá pa escribir un llibru. Yo, o mui enquivocáu ando, o tovía nun fui quién dixerila, o ye que mui bestia me paez. Ta remanada a costafecha pal gran empresariu capitalista, y ello va, en tolos niveles, repercutir en siguir -como dende qu'entamó la crisis- abriendo más la brecha ente ricos y probes; pero faciendo más probe al probe y ricu al ricu.

Habrá qu'esperar que'l gran públicu se decate... o a quien-y correspuenda!!!

17 de fev. de 2012

Jesús Laínz

Jesús Laínz ye un escritor de Santander, d'ideoloxía nacionalista española. El paisanu anda bastante esprecetáu col tema de la desintegración española, por mor de les tendencies independentistes de dellos partíos vascos y catalanes, y en menor midía gallegos.

Estos díes anduvo per Asturies presentando'l so llibru en defensa de la nación española.

Sorpriende, como ente los comentarios ta la molición que pon l'autor pol desmembramientu d'España, problema pa elli actualmente mayor que la situación económica.

Bono, l'autor tamién anda dando charres pa grupiellos como la Fundación DANAES, nes qu'echa contra, por exemplu, la toponimia non castellana nel Estáu Español, pero non dende lo que pueda ser l'orixe del topónimu en custión, un poco si vien de llatín, del árabe, d'una llingua prerromana o xermánica, sinon de si-y presta más la forma na llingua autóctona o la forma acastellanada.

Esplícome. Casos como los de Lérida, Gerona o La Coruña, que pa él valen más que Lleida, Girona ou A Coruña, que son inventaos, y non digamos yá formas ofiensives dafechu como Saragossa (el nome en catalán) de Zaragoza, nome nuna llingua non propia de la ciudá.

¡Ai, gracies a Dios que nun entra nos nomes asturianos, que si non...!

Pues yá digo, vieno a Asturies, a Uvieo a falar, y a presentar el so llibru.

Bon, pues Laínz fixo una entruga -remembrame a una que fixera un conocíu periodista asturianu de LNE nun cursu sobre Nacionalismu Asturianu- que consistía n'averiguar el númberu de países de la XE monollingües.

Vo xugar.

Bah, non, paezme una chorrada. Vamos, sicasí, xugar coles autonomíes españoles:

-Galicia ye billingüe: gallegu y español.
-Asturies ye trillingüe: gallegu, asturianu y español.
-Cantabria... coño, ésta ye monollingüe: español.
-El País Vascu ye (como Navarra) billingüe: euskara y español.
-Aragón ye trillingüe: aragonés, catalán y español.
-Cataluña tamién: catalán, occitanu y español.
-Valencia (como Les Baleares) son billingües: catalán y español.
-Castiella y Lleón ye trillingüe: gallegu, asturianu y español.

El restu: Andalucía, La Rioxa, Castiella-La Mancha, Madril, Les Islles Canaries, Murcia y Estremadura son monollingües (bono, porque nun tevi l'enfotu tampoco de meter los enclaves lusófonos n'Estremadura). Y por nun falar de Ceuta y Melilla... Y eso ensin entrar en zones de llingües propies nin en temes de sociollingüística, que pa eso hai llibros y espertos, claro.

Aproximádamente eso ye España, a nivel de llingua. Ai bono, podíamos entrar en si en Valencia-y dicen valencianu, o pa Lleón llionés, o n'Asturies gallego-asturianu... etc. pero bon, ¿pa qué?

Conque Laínz tamién tevo palabres pal IDEA, porque pa él, el franquismu foi'l modelu de proteición y desendolque de la pluralidá llingüística, non como agora. Asina, l'IDEA tevo a bien espublizar llibros en bable y pal bable. Non como agora.

Pero pola dios Taranis, que con nós nun se mete muncho, asina que lu hai que dexar, porque con nós nun va la cosa: La so guerra ta más con vascos y catalanes.

Sí que fiede esi discursu de pseudoataques a la llingua común nunca impuesta y llíbremente espardida col so discursu de prosperidá y llibertá conta las llingües catalana y vasca, qu'esparden odiu ente les persones, y son too ello imposición, política y subvenciones que caltienen la vecería nel atrasu y la intolerancia (?).

Siempre lo dixe: tolos escolinos d'España teníen que deprender la so llingua materna y otra (u otres) más d'otres autonomíes pa coexionar -si quieren y hai voluntá- España.

13 de fev. de 2012

L'Sporting ta en trata con Javier Clemente

Tres la llegada allá pelos años 90 del gran Julito Salinas a la capital de la Costa Verde, agora tóca-y el turnu al grande, al inimitable, al auténticu Javier Clemente.

Y cuidadín con él, porque asina llegó'l cántabru, qu'hasta servidor s'emocionó cuando lu mandaron a la putu paru.

Javier Clemente. A min yá me tocara velu na selección española, cuando la cosa empezó entornar.

Futbolísticamente soi de la xeneración que vió nel codazu de Tassotti a Lucho como L'Azzurra-y partía les ñaples a La Furia. Y como Julito Salinas nun facía lo que Baggio (Roberto), énte la hora la verdá. Qué bono, llueu Italia falló nos penales contra'l Brasil por aciu de Baggio, pero eso yá ye otru cantar.

Foi esa selección española con ocho centrales, esi equipu de brenga pero ensin toque, ú primaba la fuercia énte l técnica, con una táctica a la inglesa, pero con valor y llucha, qu'al final nun ganó nada y decepcionó más qu'otra cosa. Llueo a Clemente vímoslu nel Betis, Real Sociedad, Athletic Club, Tenerife... etc, etc. Ya nun fizo nada reseñable.

Pa min que la so concepción de fútbol, los sos plantegamientos, son d'otra dómina; ési fútbol valdría pa los años 70, pero agora...

Pues pal Sporting seique non. O eso o que nun había otru entrenador disponible.

Porque foi pena lo de Michel. Qué boques falen que nun se llevaba mui bien con Clemente. Marcelino, el de Villaviciosa, el qu'entrenara al Sevilla yera bona opción, bon entrenador y asturianu.

Pero va venir Clemente, un entrenador que siempre-y prestó l'Sporting.

Pa min Clemente ye la meyor opción cara l'añu prósimu heba derbi na Segunda División. Yo yá falé: La mio opción sedría Marcelino. Agora, que faigan lo que quieran.

9 de fev. de 2012

Un pouco d'actualidá

Suspenden al Xuez Garzón, por once años, por mor de la onda espansiva xenerada alrodiu la trama Gürtel, que taba investigando.  Tán a ver si s'axusta a la llei, el tema las escuchas telefónicas, ou non, pero colo que-y presta al actual gobiernu español el tema los axustes, seique foi eso. Porque entamase polos presupuestos ya desque ta entamada...

Las reaiciones nun se feixenon esperar, ya Esperanza Aguirre (tresformada na nueva cheerleader del PP) diz qu'eso yía un trunfu, ya non, nun fala de la brisca nin del tutu, sinon del estáu de dreichu.

Dende la Cai Génova en Madril agora proponen que sía Jose Luis Moreno (cola axuda del Pato Nicol) el qu'investigué los crímenes de la trama Gürtel, ya Cañita Brava los Crímenes cometíos pol Dictador Franco. Hala, el duru pa ellos, eso yía outru trunfu más del Estáu de Dreichu, ya you nun xuegu más.



La Ministra de Fomento Ana Pastor vei gastar milenta millones d'euros ya los que faigan falta más en traer l'AVE p'Asturias.

Sí, depués de la defunción de Mansín, el Gallu Montés casín, esta yía la midida que toma Madril pa repoblar col AVE más emblemáticu asturianu.

¿Sí? Pues non mious neños. L'AVE del que fala Ana Pastor nun yía un páxaru, yía un tren. Ya, arriendes de traer l'AVE, diz que "El tiempo de las obras faraónicas, de los convenios sin dinero y de los aeropuertos sin tráfico ha terminado", pero atención, ella púnxose mui seria pa dicillo.

Ai, pues queda ún un pouco más tranquilu, porque en Castellò Fabra (que yía'l cacique local del PP) feixo ún aeropuertu que ta baleiru, anque tamién pa Castiella La Mancha los $ociali$ta$ feixenon outru mayor, pa Ciudad Real.  Neso tamién hai Duerna.

Dende esti mediu somos más de la inversión segura, a plazu llongu, cumo fai Gabino de Lorenzo con Villa Madalena, que cuando eso se vaiga cobrar hai perras p'arriquecer tol conceyu d'Uvieo col de Llanera, La Ribera, Siero, Les Regueres, ya la parte Noreña. Ya pa pagar tovía unos callinos, que pa Noreña tamién los preparan bien.


Valdés xustifica'l cierre las suas piscinas municipales los domingos pola falta d'usadores.

Ellos son tamién la ostia. ¡¡¡Pero cola cantidá playas que tienen tamién dir metese a una piscina!!!



Bono, mirái, ésta nun yía una gran noticia, ya da pa lo que da; yía un pouco pa rellenar esta nueva edición de Las Novedades Anunciadinas, agora vamos con una noticia de verdá yía:

A José Ignacio Gracia Noriega marchóse-y la lluz, ya entós quedóu todo a escuras, ya hasta véu los güeyos al sou gatu Pelle, que yía cumo Doraemon.

Conque ¡joder, qué puta suerte! El polígrafu llaniscu sacóu una vela más vieya que qué-séi-you ya punxose a lleer un llibru, asina a pecho palomo, ensin más que la lluz la vela, mano a mano col llibru de Allan Poe, cumo fai doscientos sieglos. ¡Qué prestosu, qué emoción!

Ya demientres lleía'l cuentu d'El Cuervu, Soseki miagaba, ya Jose Ignacio respingábase, pero ¿queréis pensar que piso nestas un garabatu? Ya entós volvéu la lluz... ¡Putu sieglu XXI! ¡Colo bien que se taba fai 50 años!


Van facer una peli biopic de Lady Di. Que pena, pa min esi yera'l papel de sua vida pa Lilian de Celis, pero ta yá retirada. Conque escueyen ente Charlize Theron ou Carey Mulligan.

El miniteriu de Cultura ya todas esas cousas raras (no qu'entra'l cine tamién) vei proponer al director Stephen Evans -van mandar pa Hollywood de representante a un vieyu conocíu, Vicente Tini Areces, que pa eso yía amigu de Woody Allen- pa proponer que sía María Teresa Fernández De La Vega, que dende que come yogures con bífidus activu ya muncha fibra quedóu mui arreglada.



Ya hasta eiquí da pa contar dalgo de l'actualidá más rabiosa. Hai que ser bonos, ya sallar un pouco los oucalitos, el que los tenga plantandinos, porque colo que llovéu agora yá vei siendo tiempu d'abonallos.

Chao-Chao!!!

3 de fev. de 2012

¿France la unión ente URAS y PAS?

Yá lleí la noticia n'Asturies.com.

Toi contentu pol PAS. Y que conste que nun los diba votar. Como nes otres convocatories más recientes. Pero son el Partíu Asturianista, y eso, quiérase o non, pesa. O tenía que-ys pesar. Dende'l mio puntu vista son lo más paecío a un partíu hestóricu nacionaslista. Anque eso sólo-ys valga pa la recámara, porque dende finales de los 90 del sieglu pasáu lleven una debacle importante, con un viraxe a la drecha y al neolliberalismu más ranciu que se pueda ún imaxinar.

Pero, yá digo. Da pena.

Eso sí, allégrome pola URAS, porque van metese una sapada bramente guapa, y préstame que la dixeran solinos. Porque URAS, IDEAS, FAC y PP son lo mesmo, unos con más duernu qu'otros quiciabes, pero pal casu....

Faime gracia lo de la "crisis" del presupuestu ente'l Dóberman y el PP. Si nun fora porque revierte, nestos tiempos de crisis, nel ciudadanu de la cai, pero sí ho. Tien que ser una esperiencia ser de dreches nesti país del Sur del Norte.

Y digo esto porque yo hai coses que nun les pueo entender. Nun m'entra na cabeza como pueda ser que los votantes del PP tean tán a la espectativa de lo que faigan na Cai Génova de Madril; pero vamos ver ho, ¡¡¡paecemos  aboríxenes a la espera de lo que decidan los mandamases de la Compañía de Les Indies Orientales!!! ¿Pero cómo se puede ser del PP nesti país?

Que si Rajoy quier a nun-sé-quién, qu'a si Rajoy eso nun-y presta, que si Rajoy nun se punxo d'acuerdu........ Y lo peor de too ye que quien asoleya esto ye LNE, el periódicu al serviciu del PP n'Asturies...

Vaya. Nunca nun pudi ver al Dóberman, pero éstos del PP inda me paecen más zoucanes.



.... Por nun falar de la FSA-PSOE. A estos entiéndolos de mena paecía. Son la otra parte la duerna.

Nunca fui quién a entender por qué se presentó a les eleiciones asturianes pasaes Javier Fernández como cabezaleru de les llistes del partíu que calza d'encarnao. Non, nun pudi porque sábese que Javier Fernández ye un enemigu dafechu del sistema español d'autonomíes, ye un políticu d'idees dafechu centraliegues. Poro, preséntase a Presidente del Principáu. ¿?

Y mieu que da, y yá non pola so cara llobu que trai, que tamién, sinon porque ésti ye capaz de tornar competencies pa Madril de pasu. Del tema nuesu yá pa que falar nada....



Como yá ye vezu cuando hai eleiciones, ando acoyonáu cola posibilidá de qu'UPyD entre na Xunta Xeneral. ¡¡¡Ai, pero de que manera!!! Un partíu que nun val pa nada, que nun tien razón de ser (y muncho menos n'Asturies) [Cuidadín: Tienen tol drechu del mundu a presentase a les eleiciones], pero que la xente vótalos, y dan mieu. Tovía tevi viendo pola tele l'otru día al deputáu nel Congresu Toni Cantó y yo asouriaba, y eso que tamos n'Asturies, que nun se nos da mal, pero a ési non, ¿eh? Eso non.



Bloque-UNA, PAS y Conceyu Abiertu. Ta la cosa jodida. Y ehí tán les pruebes. Cuartos nun hai. Piesllen empreses asturianistes, como Paraxuga, como la Llibrería Trabe, como Alborá, o, recién, la edición impresa de Les Noticies. Cuido qu'estos partíos nin tengan munchos cuartos pa metese otra vuelta nuna campaña electoral.

Si a min m'entrugaren, dicía-ys que foren de la manina xuntos, y asina lo más probable fora que nin asina diben entrar na Xunta Xeneral. Nun apostaba por que sacaren ún deputáu ente toos. De fechu, nun sé si lu algamaríen diendo con IX (esto ye, si ameyoraríen los resultaos presvistos pola coalición IX-LV pa estes eleiciones o, seique, les pasaes). Pero lo que sí puedo dicir yía que diba ser bon pegoyu pa crear un partíu nacional d'esquierda con posibilidaes nun futuru non mui llonxe de meter un pie na Xunta. Y d'ilusionar a la vecería. Con fuercia y presencia.


Per otru llau, ¡meca eleiciones! Huas huas huas.... Ríome de los del BNG. Y de los sos enemigos n'Asturies [la prensa amariella de dreches que toos conocemos]. Porque home, si tanto diben facer una estructura n'Asturies, agora qu'hai eleicioens y llega la hora la verdá...Presentaranse ¿non?

¿O igual mentía daquién? ¡¡¡¡Oooooi, qué pouco xeitu!!!!