De cómo nun nos atopamos

El presidente del Principáu, aquel que nunca ta, acaba beber la copaya de la Paz con un políticu d'Angola. Ello foi que los d'Angola abrienon un consuláu n'Asturies, y fonon todos camín d'ehí a la espicha. La verdá ye qu'hai coses que nunca nun se pierden.

Y cómo non, nesa perdióse otra bona oportunidá, d'estrechar llazos de la manera más natural que pueda haber: Cola llingua. Pero non col castellán esi que glayen que falen cientos y cientos de millones de persones. Nin col asturianu, por muncho que preste y que teamos n'Asturies. Pero si nun mestu d'ámbos, sí, na otra llingua prestosa asturiana d'Asturias y d'otros cientos de millones de persones mundu alantre: El gallego-asturianu, el gallegoportugués.

Home, yá sé qu'esi nun ye'l perfil universal del presidente. Nun nos engañemos, tamos n'Asturies que ye un país con una clas política (y los que los voten) de pacones. Poro, ehí nun hai esa ocurrencia d'ermanar Asturies con Angola a través de la llingua, y muncho menos d'usala nel actu.

Pues nada, otra oportunidá perdía p'Asturies

Un estudiu sobre los linaxes asturianos

http://www.elcomercio.es/20140411/asturias/estudio-rastrea-huella-genetica-201404111053.html


Ehí l'enllaz de la noticia. Y ehí todo'l sensacionalismu.

La cosa ye que se fala de linaxes xenéticos, pero la vecería entiende "pureza racial". Y yá se jodió entós todo.

Yo'l mapa entiendolo polas rellaciones que se dan de casorios, matrimonios, families, etc. Pero la xente yá amesta que sí unos son más gallegos, otros más asturianos de verdá y otros más santanderinos. Lo que nun entienden ye que la xente de tal valle güei va a tal hospital porque ye'l que-y queda más cerca; y fai dos mil años diben al mesmu valle a facer mercáu (si tamién s'estilaba eso) porque yera lo que más cerca teníen, y por ello les relaciones siguen siendo asina.

País de pandereta...


[Por nun falar de la parte atávica que entiende la diferencia en términos cualitativos: meyor/peor]

Xeografía Humana

Que'l debate de la territorialidá n'Asturias tenía que tar abiertu, yía más qu'una obviedá. Empezando pola toponimia, que tenía que dir xunto a Ordenación del Territoriu; pero siguiendo pola propia toponimia, porque las Oligarquías Llariegas faen lo que quieren colos nomes de los pueblos (ya conceyos).

Por nun siguir col tema de las parroquias rurales, los entes locales menores, ou la supresión (presunta) de Conceyos del Principáu; tema qu'amás nun depende de nengún criteriu alministrativu ou xeográficu, sinon más bien a una moda d'estas que llegan de Madril.

Pero si los pueblinos por un llau, las parroquias rurales (que faltan cásique todas) ya los conceyos tán amenazaos agora tamién la propia autonomía...

Las Oligarquías Llariegas yá sonan; en principiu yía un burbús, pero que quier llegar a principiu d'alderique, con cierto envís de problema Nacional -nacional español, of course.

La cousa nun tendría más gracia de nun ser porque yá hai un parllamentariu na Xunta Xeneral -BocaChanclaMan- ya un par de partíos del llau ranciu aportan p'Asturias: Vox -cola mano tendida de FAC, pa estas elecciones Europeas- ya Ciudatans.

Yía por eso qu'un llee esto ya cumo yá conoz l'ambiente, arízanse-y los pelinos de pa contra'l renaz.

Por supuesto qu'esto nun deixa de ser un spam d'una persona afín a las oligarquías ou con muncho sentíu del humor. Bono, ou con una distorsión de la realidá aguda.

Oh, non, nun me malintrepreten, porque you nun toi encontráu con Kazurristán. Pero si nos tenemos que xuntar tenemos que ver lo realmente importante, el quéi de la cuestión. El conteníu de la Unión.

Analizando la carta, dende una perspectiva asturianista d'esquierdas, opino:

-Que'l destín d'Asturias cumo pueblu yía propiu de sou. Que nun depende -mui a pesar de lo que'l nuesu presidente (que nun recuerdo'l sou nome, pero pertenez a la FSA)- de la relación d'España con Cataluña nin con Madril.

-Que nel mundu nel que you me muevo -los Baxos Fondos del Occidente d'Asturias; el lumpen-proletariáu-ruraliegu- nun se contempla la desaparición d'Asturias cumo autonomía por ser pequena ya ruina; por muncho qu'unos caderalgos de qué-séi-you decidan esta sí, esta non, ya por eso Madril sí, pero Asturias non (?). [Anque igual yía verdá que nel mundu académicu madrilán funciona la cultura del enchufismu ya tramas gürtel ya demás, puestos a deu incluyíos, cousa que tampouco séi, porque nun vou dici-ys cumo se tienen ellos qu'organizar]

Ya que, finalmente, Zamora ya Salamanca aparte, si de verdá remotamente saliera alantre una autonomía conxunta esta sólo podría basase na autonomía asturiana, ya non na autonomía Castellano-Leonesa, a pesar de las Oligarquías.

Poro, you -que tamién séi proponer cousas p'Asturias cumo los caderalgos de Madril- vou proponer un camín (igual puede haber más, pero esti yía'l míu) pa xuntar Llión a Asturias.

Pa empezar, ya volviendo a lo primeiro del ensiertu, había que modificar el territoriu asturianu, de tal manera que d'una vez se resolviera lo de tema de la ordenación del territoriu. Esti sólo pue organizase en parroquias rurales ya conceyos, con mancomunidaes (ou comarcas funcionales) que sirvan pa compartir servicios, cumo hospitales, ambulatorios, facienda, equipamientos, servicios varios... etc. Ya las parroquias son los entes que vertebran el paisaxe rural d'esti país.

Una vez que se saque esto alantre, tenía que se modificar l'Estatutu pa que tolos territorios adxacentes {¿un palabru? Meyor igual los "que limitan"}que quieran se puedan integrar en base a argumentos históricos ou culturales.

Ya eiquí, si nos territorios al sur de la Cordal hai voluntá de ser asturianos ou castellano-llioneses, yera óu se diba ver bien si se podía siguir p'alantre ou non.  Porque nesta carta nun se fala nada, pero temas cumo'l d'Escocia ou'l de Crimea tán de rabiosa actualidá. ¿Por qué Sayambre ou L.laciana nun van -si ellos quieren- pertenecer a Asturias por cuenta de Castiella ya Llión si ellos deciden asina?

Si los municipios del norte de Llión decidieran apoyar una unión a Asturias sería lo mesmo que nada; pero si los municipios del norte de Llión decidieran... ya pancima Madril dixera que p'alantre colas cousas estas; la provincia de Llión podría entrar nuna Comunidá Asturiana, na que yá de pasu, fuera eso de "Principáu".

Eso sí, si los llioneses entran nesa Asturias, tendrán que converxer.

Con datos obxetivos Asturies tien 14 hospitales por dos de Llión. Asturies tien empresa pública, a partir d'entós esi tendrá que ser el modelu pa Llión (¡Yá compartimos a Vitorino bastante!). Por exemplu, col modelu RTPA en vez del modelu CyL TV. Ya no de la Llei Wert, Llión tendrá que tar a las duras col restu d'Asturias, Canarias, Andalucía Cataluña ya'l País Vasco. Etc.

Pero si don Ángel Pajín cree que tenemos que ser nós los que privaticemos la sanidá nuesra, los que matemos la empresa pública, los que teamos al llau de Valencia, Murcia, Baleares, ya Madril ya, en definitiva, nos paezamos al outru modelu d'autonomía... a min que m'esborrien.









Agora bien. Hai tamién outra manera de lo facer. La d'arriba nun yía que nin siquiera fuera especialmente ambiciosa. Sólo trata de mantener los platos sanos. Pero podemos facer una autonomía-batulax: Llión, Asturias, Salamanca, Zamora... etc. Con capital fuera d'Asturias. Creando tol aparatu autonómicu de 0. Colo que claro, será muncho menos ambiciosu esi modelu que'l que tenemos güei n'Asturias. Con 1.000.000 de personas que desconocen l'asturllionés ya'l gallego-portugués na sua mayoría.

Conque ¿cúmo nos lo pintáis a los asturianos?

¡Asina non!

Según LNE por fin van facer el Polígonu Industrial na Rodriga.

Yía una mala noticia, porque vei ser un fracasu, cumo nun puede ser d'outru xeitu. Ya la esplicación yía mui fácil:

Na secuencia lóxica los motivos que llevan a la construcción d'un P.I. son varios, pero más ou menos vendría ser dalgo asina:

Constitución/construcción d'empresa/industria ===> Suelu Industrial 

Esto yía, frutu de l'actividá empresarial llega la ordenación urbanística pertinente. Yía cumo si contratamos un seguru pa una casa antes de tener siquiera los planos feichos, cola cousa de que teniendo un seguru yá llueu se pondrán los ladriyos...

Los costes estratéxicos del polígonu (llamaos costes d'oportunidá) yá nin se plantegan, porque eiquí impera una fórmula que yía conocida de vieyo:

Lliberación de Suelu ===> Construcción desenfrenada ===> Especulación ====> Toos ricos ya felices

Y con grandes cifras podemos inflar una borbolla especulativa, ya inda más con un bien que nun se sabe si yía d'aforru ou inversión, ou tanto d'una cumo d'outra. Cúmo non, productu directu d'ello yía esta cultura que queda:

Si se constrúi dalgo queda

Ya vuelta a empezar.

Polo que me paez sorprendente esta outra noticia, tamién de LNE. Esto yía lo que you llamaría una borbollas informativa.

Ellos cuentan facer un polígonu industrial en La Rodriga, pero nun hai empresas ya nun se sabe cúmo las vei haber: Yía dicir, hai incertidume sobre'l funcionamientu d'ello, sobre la viabilidá del polígonu en sí. Yía una vieya apuesta del Conceyu (nel sentíu d'Ayuntamientu), cola cousa de qu'hai bonas comunicaciones ya la veiga yía bona abondu.

Pero cuenta, ente outros, colos siguientes inconvenientes:

- Yía una veiga inundable.
- Nun existe certeza nin evidencia real de que vayan venir ou nacer empresas a partir de la creación pura del polígonu.
- Nun s'axusta a una idea de realidá, finalmente, sinon que'l polígonu tien proxección sólo na cabeza d'algunos políticos.
-Ya LNE xuega a desinformar -xunto cola xente que coloca ehí esi escombru- pa promover el polígonu.

Polo que vese qu'interes habellos, hailos. El principal periódico asturianu, una importante empresa minera ya los promotores d'esta brillante idea anecian col polígonu...

La Veiga de La Rodriga podía guapamente esplotase, pa usu agrariu, cumo bancu tierras... Podía sacase rentabilidá ya mantener un esquilibriu medioambiental. Amás, atraviésala'l Narcea, ya podia ser l'agricultura un complementu xenial a la pesca del salmón ya'l turismu que trai consigo.

Pero non. You nun lo entiendo.

Pero tate, qu'ou esfarrapan bien, ou yá-ys llegarán noticias...

Rústicos n'Asturolandia, lo Vintage ta de vuelta

Esta entrada quiero dedica-yla a toa esa xente asturianista que ta porque FAC sía'l partíu qu'encardine la defensa de la llingua asturiana

¿Y nun saben por qué Álvarez-Cascos se fizo non-del-bable-pero-casi? Ah, pues yo sí lo sé.

Ello foi que cola Crisis, en Madril lo último ye salir quexase [n'español dicen "indignarse"], y claro, la muyer del Dóbermann, como ye un poco pijippie aprovechó'l tirón d'Asturies:

- Ta llonxe del Llugarón.
- Hai tradición obrerista y reivindicativa.
- Tien una llingua propia y una cultura.
- Tenemos identidá, somos un poco como catalanes, pero caemos bien.
- Tien verde pa que se pasé la so gocha vietnamita..

Polo que toi seguro que foi ella la que convenció al Dobermann pa que tornara camín d'esti país del Sur, pero del Norte, que ye siempre una cosa chocantona pa la xente bien de la gran ciudá.

"Oye, Paco, ¿y por qué con la crisis no volvemos para Asturias a plantar nabos? Pìtita tiene una casa en Sardéu, y la temporada de Opera en Oviedo dicen que está chula. Además está Doctor Mateo, y Sones y el programa de Camilo, que yo soy mucho de montaña".

Y asina foi que convenció al so home.

Y claro, entainaron camín de L.lubarca que ye ú tien la familia'l Dóbermann. Paez que lo toi sintiendo...

"El bichu esi, pero él ¿qu'íyía? Mao, se nun yía ¡un gochu! ¡Mirái p'al.lá, se nun ta curiando un gorín!". (La primer vecina cola que fala la muyer).

Claro, vais dicir "esto tas inventandolo tu too". Pero non ho. ¿Si non como se puede esplicar esto?

Ai, non perdonái, enquivoqueme. Quixe poner esto otro.


Pero ye verdá. A min fascíname'l Rexonalismu-Ranciu-Españolista-de-Dreches del Dóbermann. Y por ello entiendo mal cómo pue una persona como Inaciu Iglesias con una traxectoria más qu'importante nel mundu les lletres asturianes dar la cara por él. Pero bono, allá ellos y el so auditoriu.



Yo nun puedo colo de FAC. Sólo me presta la guerra que tienen entamada cola Nueva España. Pero polo demás...

El Dobermann tien tolos sos referentes ideolóxicos dientro de la mayor puxarra que dio esti país llamáu Mistol. Amás ye la naturalidá colo que se reivindica aquello. A min -que toi como una cigoreya- paezme que'l tema de la llingua pa Cascos ye una cosa como'l tema del VIH pa Thabo Mbeki, un presidente de Suráfrica, al que-y paecía que, bono, el sida esistir esistía, pero cómo se tresmitía, igual nun yera como la ciencia del sieglu XXI establecía.

Sí, sé que'l sida mata, y la llingua como muncho empapiella (o inda sal a pacer, que tamién) pero pal casu, el razonamientu nun dexa ser similar.

Y por otra banda, ta lo de las referencias al asturianismu más vieyu. Ello ye pola querencia de muncho asturianista que-y entra murnia porque Asturies nun tien un PNV, y tien la convicción de que lo qu'Arana dicía pa 1893 sigui siendo perfectamente válido como dogma irrenunciable pa los Jeltzales. Pudiera ser, que nun lo sé, porque nun conozo esos ambientes, pero a min esi virax vintage repúname y ofienderíame si fora humanu.

Pero esti razonamientu traime a la mente al Salafismu, esa corriente fanática del Islam que  lleva a un interpretación del Corán lliteral baltando tolo que se fixo depués en sieglos, que básicamente inspiró a los Muyaidines y a los Talibanes; ello naz d'una mala llectura desordenada, d'una vocación salvapatries y d'una falta de perspectiva espacio-temporal y de total empatía.

En fin. A la xente que ta con FAC [Ye qu'hasta eso me sona mal] Dios los bendiga.

El nuesu padremuñu inmaterial

Hastasagora paez que'l Padremuñu de Cultura Inmaterial Asturianu yera dalgo nun sólo inexistente, sinon un incordiu, sobre too pa les élites llariegues, que como un corifeu d'un teatru romanu dirixen la opinión del d'abaxo, y asina queda'l "home ho, ¿eso pa qué, ho?".

Y tovía ta na retina la propuesta pal reconocimientu inmaterial del Gallego-portugués, aquella qu'incluía al gallego-asturianu y que, dende Asturies, fíxerase tolo posible por baltar.

Pero nesta Historia de puesta en valor al resto de la cultura inmaterial hai dende instituciones como'l Muséu del Pueblu d'Asturies, y la rede de museos etnográficos d'Asturies, como'l trabayu de tola xente que foi pelos pueblos recoyendo tol saber popular; los músicos, escritores, estudiosos, etnógrafos, profesores, aficionaos, llingüístas...

Mención había que facer tamién al éxitu del programa d'Ambás na TPA, que foi un trabayu mui bono porque espeyaba'l llabor d'un etnógrafu (bono, nesti casu un músicu) que brindaba tol procesu dende que fala col paisanu hasta que la pieza se reellabora, y qu'a la xente-y prestó pola vida.

Polo qu'agora n'Asturies tenemos trés bienes esperando pal so reconocimientu: La Misa de Gaita, la Toná, Asturianada o Canción Asturiana y la Cultura de la Sidra.

Teo que dicir que soi un poco partícipe de les trés, y por ello toi contentu.

Creo que ye mui bonu pa la nuesa cultura, porque chisca a todo: Ye bono por exemplu pal Idioma, porque dientro de la cultura sidrera o de l'Asturianada hai bien de lletras o términos n'asturianu, que van tener un reconocimientu, como llingua independiente, que lo merez. Eso, amás del so valir económicu: pa la producción de la sidra o pal mundu l'espectáculu y puramente musical.

Polo que yá yera hora que nos (se) decataramos (-án) del valir d'esi patrimoniu, los intanxibles, el valor añedíu, que tanto se fala nestos tiempos últimos.


Con estas noticias tamos de norabona, y esperemos que-y vala a tola Humanidá; dende Asturies al Mundu.

¿Qué comedia yía esta?

Ensin cole, tase meyor, yía una especie d'axioma que teníamos la mocedá del miou tiempu. Polo menos en Salas hai bien áu tirar, que si Visu, que si Aguión, que si ríu, que si mina, que si chigres... una oferta espampanante.

Pero si en verdá sos de la Ría Miranda, entós non, porque esi yía'l camín pa, si sos d'ehí, endrogase. Porque na Ría Miranda son muncho d'eso.

Ello yía qu'a los rapaces que van camín de Salas pa calecer las sillas del Prostitutu quitanon-ys el coche-llinia, ya ¿qué van facer los probes piteiros? Pues qué queréis que vos diga, un balmontinu na tua vida siempre l'allegra. Yia la nuesa metáfora del homosexual (asigún lo dixera un homosexual de verdá: Falete): el floreiru que tien d'haber en toda casa. ¿Ya qué yía una casa ensin floreiru? ¡Ello allegralo todo bien!

Polo que los probes neños de Balmonte (pero n'especial los de la Ría, que son los más simpáticos) cumplen un doble trabayu: Calecer ya crear ambiente.

Pero yá lo dixe, que son xente mui d'endrogase. Mui macarras. Un pouco cumo'l ministru Montoro. Bueno, tanto non. Un pouco de James Dean, pero pouco más.

Claro, lo que pasa yía que son los d'Uviéu, qu'ellos tolo saben, ya quieren mandar a los neños camín de Grau, porque asina llueo da pa zarrar el Prostitutu de Salas, ya con un Institutu en Grau tenemos pa todos, gastamos menos, ya halón, ya'l Madrid outra vuelta campión d'Europa.

Pero yía que'l Prostitutu de Salas yía una fonte de creación de sinerxías a nivel d'Asturias (bono del Conceyu Salas polo menos; del Conceyu Salas ya la redolada) unde igual se fai un desfile de modelos que se vei reventar unos poucos oucalitos (polo menos nos mious tiempos.... ) ya ello prestaba.

Ya a nós préstanos que vengan los de Balmonte, porque son mui animaos pa crear sinerxías. Ellos falan d'entelequia; bono, yía más entelequia qu'outra cousa: ehí los famosos guateques nos años 2000 ya 1990, cuando sólo taba Salas ya Benidorm, ya Benidorm sólo en temporada baxa.

¿Cúmo nun se puede ser de Salas ou de Balmonte ensin saber que yía un guateque ou facer una espicha nel Visu ou un botellón na Mina? Pues dígovos la verdá, que quién conoz las espichas de química ou de bioloxía ya nun conoz las espichas del Visu yía cumo quién nun conoz nada... ¡Ya canela'l que conoza espicha nel Visu más Vuelta Ciclista más pire del Prostititu!

Pero manca, manca que nun lleven a la xente de Balmonte pa Salas. Yía'l preludiu del fin [Un preludiu del fin nuna yía un postludiu] del Insitutu de Salas, que yá yía pequenu de por sí.

Ah, que penina