29 de ago. de 2014

Un espaciu astur

Ainda teo lo del Ancontro de Cicuiru na cabeza. Parezme que vei ser un puntu d'inflexón na historia de la reivindicación del idioma: Un pequeñu pasu pal asturllionés un gran pasu pa la reivindicación del mesmu.

Pero claro, l'ambiente foi bono, ya la xente tien ganas d'aconceyar, pero hai que tener cousas en cuenta, cumo qu'esto ta tovía al puntu de comienzu, un poucoñín más. Polo tanto tamos nel tiempu d'ideas, porque voluntá toi seguru qu'haila. Ya ganas. Bon, tenemos xente ya infraestructura: son las asociaciones que participanon nello. Ya creo que mentres la cousa avace tovía se vei xuntar más xente ya más asociaciones ya instituciones.

You teo na cabeza dende que volvi pa casa la idea de, si los franceses tienen la Francophonie, los portugueses tienen la CPLP, hai una Anglosfera... ya no más pequeñu hai unas Naciones Celtas, una Occitania, unos Països Catalans, una Euskal Herria...

¿Nun taba bien crear algo asina a nivel d'Asturias, Llión, Zamora ya Miranda?

Bien, séi qu'Asturias bien podía pidir -ya tenía que lo facer- la integración na CPLP porque tien una parte de fala gallepoturguesa. Ya tamién se tien pidíu participar (xunto a Galicia) nas Naciones Celtas, grupu col qu'hai una mui bona relación, ya compartimos espacios culturales, casi cumo una nación celta más. Pero colo de las Naciones Celtas echárase p'atrás daquella a Asturias ya Galicia porque nun tienen una llingua céltica. La nuesa yá llatina, ya nin siquier tien esto que toi pidiendo, más que nada porque tamos verdes...

Pero al filu que cuntaban en Cicuiru un compañeiru de Iniciativa pol Asturianu tien que se poder compartir la producción cultural. Ehí yá hai un filu. Ya tien que se poder facer frente común a cousas propias de la llingua. Hai qu'organizase ya coordinase.

La verdá yía que la idea que you vou poner yía dalgo que se me foi ocurriendo a mi, pero prestaba que fora cumo una bola nieve, ya fora medrando.

El nome: Lo más fácil del mundu. Si los asturianos somos ástures tresmonanos, ya los zamoranos, mirandeses ya llioneses son ástures augustanos, el nome tien que se rellacionar colas tribuas esas prerromanas: Países Ástures, Ástur-fonía, Asturia, Asturistán... Nun séi, a mi personalmente préstame Asturia ou Asturfonía.

La rellación que tien qu'haber ente los cuatro territorios tien que ser de solidaridá ya d'harmandá. Quierse dicir, esto nun vei ser una xuntanza d'un territoriu colos sous territorios satélites. Dicho d'outru xeitu, esto nun vei ser una especie d'Imperiu (por exemplu) Asturianu cola sua constelación de comarcas satélites... Bon, d'ehí que nun vala la construcción en base a plantegamientos hexemonicistas nin xovinistas. Esto yía un aconceyamientu ente países harmanos, óu cada miembru tenga'l sou votu, la sua voz... ya las suas circunstancias ya coyunturas, claro.

Las asociaciones que participanon no de Cicuiru podían trabayar nello, ello valía pa puntu de salida. De xuru qu'alguna más vei subir al carru, bienllegada sea.

Claro que lo bono sería que se patrocinara una fundación ou algo parecíu. A instancias d'algún organismu políticu. A mi prestábame que fora a través d'esa organización pa las lletras asturianas que'l Principáu nun foi crear, pero qu'antes de la crisis tanto se falara. Un Institutu Ramón Llull ou Etxepare pero a lo asturianu. Ou a lo llionés ou zamoranu ou mirandés... ou ¡qué carai, bercianu siquiera! Pero qué falta facía pa equilibrar la situación del asturllionés nos Territorios...

Obviamente esto de la creación del espaciu cultural ástur nun sería problema pa que cada territoriu siguiera perteneciendo óu perteneza ou participe óu quera. Si un territoriu nun quier participar, sería una pena. Si Asturias ou Llión nun quixeran participar, pues... los outros p'alantre hasta que se decidan. Ya nin tampouco sería problema que, por exemplu, Asturias por fin fuera almitía nas Naciones Celtas ya na CPLP ya siguiera sin mayor problema cumo socia d'Asturia.. .etc.

Pero ta claro qu'Asturias yía un país plural que quien defenda esta idea que toi poniendo (ou alguna parecida) tien que por llei tamién apoyar una entrada d'Asturias nun espaciu propiu del área gallegoportuguesa, porque lo mesmo que l'asturianu yía llingua propia ya tradicional tamién lo yía'l gallego-asturianu, ya eiquí nun tamos por poner ciudadanos de primera ya de segunda. Ya Llión ya Zamora tamién tienen las suas rellaciones colos sous vecinos ya eso. Al cabo'l llionés en Zamora (por exemplu) fálase nunas comarcas al noroeste, por exemplo, pero la provincia yía mayoritariamente de fala castellana...

Tamién convien falar de que la nuesa llingua yía variada. Ya cumo outras llinguas tien duas normativas duas formas d'escribir, una a l'asturiana ya outra a la mirandesa, según teamos nel Estáu Español ou en Portugal. Pero realmente ello yía lo bono. Al final esti tipu d'asociaciones, aconceyamientos ou rexones culturales tienen lo grande de que son reflexo de pluralidá, ya sólo por eso sirven bien. Amás sirven p'arimar a Mirandeses ya Portugueses un pouco más a Asturias ya a España, ya a los Asturianos ya Españoles a Miranda ya a Pertual. Yía bono esi intercambiu

Pues ello ahí ta. Tenemos el camín marcáu dende Cicuiru, hai asociaciones pan-asturllionesas (El Teixu yía una asociación qu'abarca los cuatro territorios) ya día a día veimos avanzando. Ya na meta espéranos solo cousas bonas.

2 comentários:

  1. Y los cacharros, en Trabazos6 de setembro de 2014 às 00:12

    "Asturofonía", Diestru. Y la llingua, "asturorromance" (en paralelo a otres expresiones yá consagraes como "retorromance", "dacorromance" o "galorromance"). Dalgún nome d'estos yá lu echemos a rodar nos Alcuentros d'Escritores n'Asturianu Occidental´hai una década xusta.

    ResponderExcluir
  2. Paezme que lo que tas falando tien muitu más que ver cola Francofonía, la Lusofonía... que colos Païssos Catalans o Euskal Herria, porque los Païssos Catalans o Euskal Herria (traducío, Países Catalanes y... País Vascu) son proyectos nacionales nos que s'interpreta que Cataluña, el País Valencianu ya las Isllas Balerares (amás de La Franja del Ponent o del Levant según se mire ya quién lo mire...) conforman una única nación, ou que Bizcaya, Guipúzcoa, Álava, Lapurdi, Zuberoa ya la Alta ya la Baxa Navarra conforman una nación.

    Nun tengo del todo claro que Lleón, Zamora ya Salamanca podamos consideralas tres terriorios... Nun deixa de ser todo'l País Lleonés.

    Paéceme mui interesante lo que propones, la verdá ía que iba a ser muitu, pero que muitu meyor pa todos facer una gran agrupación llingüística d'Asturias a Miranda. Ya veixo que nel País Lleonés hai muita xente dimpuesta a apostar por esto :)

    ResponderExcluir