Depués de les elecciones

Acabaron les elecciones, y yá se vuelve respirar otra vegada l'aire contaminao asturiano con total normalidá.

Al final la xostrapada del asturianismu (Bloque-UNA-LV y AA) sedrá bramente remembrada. Y de lo que nos vamos tamién acordar va ser de la entrada na Xunta Xeneral d'UPyD, el partíu que-y presta a Ynestrillas.

De mano, lo primero que fexo La Neña del Exorcista foi declarar xunto a la política profesional de Sodupe en Madril.

El dóberman vieno diciendo -como nos meyores tiempos del Partíu Asturianista- que con él diba terminase'l sucursalismu de Madril, por más qu'él viva la mayor parte del tiempu ellí. Pero ye qu'agora ye lo que nos faltaba, si yá lo facíen poco PPSOE, agora  con UPyD yá directamente, la so sucursal asturiana, da ellí les sos ruedes de prensa.

Y dicen que se metieron ente los pexes más grandes. Eso dícenlo como quixendo dicir qu'ellos son un partíu pequeñu; y sonlo en militancia, puesto que nun hai UPyD a nivel municipal. Pero eso sí, en cuestión de perres, tienen más que tolos partíos estraparllamentarios asturianos xuntos... inclusive a nivel estatal. Porque yo teo visto per Uvieo un autobús de campaña d'UPyD a tou trapu, y eso tien que costar cuartos...


Préstame güei enforma la espístola de Gracia Noriega na fueya parroquial. Y préstame abondo cuando fala de Cherines. Bono, y de too. Eso pasa-y por ser, demientres bien d'años, tán, precisamente, de dreches y reaccionariu.

Bono, de traca lo del presidente de Cantabria. L'otru que teníen, el de los bocartes, ési que diba pelos programes de TV que tal paecía la vieya de los anuncios de fabada enllatada; pues ési non, sinon el nuevu. Pues al nuevu que tienen ¿Nun se-y ocurre más que dicir "el PP n'Andalucía, el PSOE n'Asturies"? Contesto: Y Cantabria, pa tener un estadista d'esa guisa, que tornen a  Madrid el so estatutu, y que los metan pa con Castiella, que total... tanto da (y tanto importa al personal de perende).

Pues respective a lo de La Neña del Exorcista, yá teo ganes que llegue la Selmana Les Lletres. Ésti igual cola pa Colombia o prehí. Va pidir que faigan la Selmana d'esti añu n'honor de Palacio Valdés o de Leopoldo Alas alias Clarín. Pena qu'eso nun se vaya saber...

Nel colexu electoral ú voté taben escondíes les papeletes del BpA-UNA-LV (na cabina ú se votaba) xusto nes baldes que (coincidencia) yeren más anches. Conque les papeletes víense peor. Pero tar, ai non, eso sí, taben. Ye una pequeña zancadilla más. Eso sí, fuera de la cabina solo había una repisuca con cinco sitios baleiros, y ¿a que nun lo creeis? Taben puestes les papeletes de Foro, PP, PSOE, IX y UPyD, pa llembrar a quién votar. Vaya full!

Marcha -como yá adelantaba nun insiertu anterior- Marcelino Marcos Líndez pa Uvieo, y yá nun va ser alcalde Tinéu. Llevolu'l Llobeiru porque-ylo mandaron, y agora tienen pa Tinéu alcalde nuevu: Jose Ramón Feito, vaqueiru de La Bouga, Salas. Colo que va ser -depués del alcalde Salas- el segundu alcalde (polo menos asturianu) salense n'exerciciu. ¡¡¡Manteca-teca!!!


¡¡¡Qué cuatro años más grandes nos esperen!!!