10 de mar de 2012

Especial Elecciones Nacionales 25M

Unes declaraciones na prensa asturiana de Sosa Wagner. Sí, atención Sosa Wagner:



Ési.  Cada vegada qu'abre la boca suena esta sintonía de fondu.

Francisco "Richie" Sosa Wagner ye eurodiputáu (por España, por supuesto) nel Parllamentu Européu, pero punxo escuela n'Uvieo, d'ehí que tenga muncha gracia pa colos asturianos.

Bono, pues tevo una ocurrencia agora que ta mui de moda, que ye tol tema de la reducción de Conceyos (o municipios pal restu del estáu) y que, dende la mio visión (simplaya per otru llau) ye intelectualmente mui feble. Y, yo que soi simplayín, pero un partíu nel que militen Fernando Savater, Álvaro Plombo, El Tontu les Toreyes Gaches, Leticia Sabater, la Funcionaria de Sodupe (sobre too), ente otros, creo que tal-yos pagaba la pena pensar dalgo meyor.




Vaya. Vese nel mapa cláramente como los conceyos d'Asturies tienen un tamañu muncho mayor que los de la media estatal. Sirva d'exemplu qu'Asturies teniendo aprosimadamente'l doble d'estensión que Cantabria tien 78 conceyos frente a los 102 municipios dáquella.

Pero bono, ye lo que tien la vagancia intelectual de los militantes d'esi partíu, polo menos no que se refier a les sos propuestes polítiques. Equí tamién hai que reducir conceyos, y si-y entrugan a Sosa Wagner o a Leticia Sabater cuántos conceyos tien Asturies la rempuesta sedrá: "¡Milenta ún!" Y eso que nun falen asturianu.

¡Qué-yos vamos facer! Xente asina tienlo qu'haber, que sinon de qué nos díbemos rir. Son un poco lo peor del Partíu Conservador Británicu -pa lo económicu-, el gaullismu pa lo nacional, y el Partíu Democrata-Lliberal, tamién Británicu, pero d'estos sólo gasta la imaxe.

Esta selmana, l'economista David Rivas fixo un ensiertu nel so blog que, personalmente, prestome asgaya.





Y bono, como non, pa nun m'igualar muncho a esta gadofia d'UPyD, voi proponer otra vía, qu'igual sirve p'Asturies, anque pa otres partes del Estáu, igual nun valga. Pero ye lo que tien, Asturies is diferent.

Deixái los conceyos como tán. Home, si queréis, xuntái Os Ozcos, los trés nún conceyu solu. O Samartín del Rei Aurelio con Llangreo. O'l Valle Baju col Valle Altu Peñamellera... ¡Qué sé yo!

Pero si se quier, de veres, aforrar gastu, nel nuesu drechu foral, nes nueses figures de drechu consuetudinariu asturianu, hai salides propies, vetustes y afayadices pa iguar una meyor alministración, polo menos p'Asturies, anque igual nun tea ningún xacíu aplicales pan Valencia, pan Madrid o pan Cataluña.

Figures, qu'apaecen nel Estatutu d'Autonomía, como la Parroquia Rural, que ye obxectu de desentralización, puede aforrar gastu, nos conceyos rurales y nes faces rurales, y una xestión más conforme a les necesidaes, los recursos y l'autoxestión de los vecinos. Les Andeches, similares al auzolan vascu, son una adaptación a les reformulaciones práctiques (y teóriques) del nuevu Socialismu del Sieglu XXi; tando como tán les coses, ye una figura de primer orde, que puede traer mesura, puede ordenar meyor el mediu rural y optimizar recursos na Asturies rural (por nun falar de l'Asturies urbana).

¿Fálase, entós, d'optimizar recursos o d'uniformar l'Estáu? A esta conclusión habrá que llegar caún como vea. Posibilidaes, seique heba más.

Pero dende equí, úfrese un argumentu (quiero pensar que propiu de la Esquierda Nacionalista Asturiana) frente a, dexemoslo en "raro", del nacionalismu xacobín y populista d'UPyD.

Nenhum comentário:

Postar um comentário