Presta, a la hora volver a casa, depués d'un duru día de folganza mundu alantrones llegar ya lleer a Grasa Noruega. Güei, depués de mercar pa facer porros, púnxeme a ello, a ver si lleía en LNE dalgo d'esti home. Ya sí ho, dalgo había.
Na sua epístola matutina, Grasa Noruega alcuérdase de Javier Marías, un puntu que tien carencias d'informática que nun-y permiten ni prender un ordenador. Conque por outru llau a min eso valme, porque asina nin Grasa Noruega nin Javier Marías pueden lleer lo que voi escribir nesti ordenador. Amás, Grasa Noruega a partir de las 18.00h yá nun llee nada, porque ya nun hai lluz natural, ya lleer a Dostoievsky con lluz eléctrica ye pecáu. Vaya, que Grasa Noruega yía un pouco cumo Chuck Norris, pero de lo que vien siendo las lletras.
Nun sé que moleición-y prúi agora pa cola llectura d'El Quijote, que ¡ai, los mozos yá nun van ser quien lleellu!
Ya yía verdá. You miesmu -teolu lleío ans xa che fai- si me puengo nun sou, porque cánsame la vista, con tanta lletra pequena, ya yía una putada, ya amás tamién yía un llibru mui gordu, ya ensin colorinos.
Mirái sicasí, que nun teo esi problema cola nueva lliteratura. Touve ehí atrás lleendo un llibru que llamaban "La Rana Mariana" con una fía de 5 años d'un primu míu ya mui bien, ¿eh? Tenía la lletra gorda qu'eso sí se vía bien, ya amás taba illustráu a too color.
Lo que yá nun entiendo tanto yía esta contradicción na que se mete Grasa Noruega él solín. Porque Farturinas diz que sí los más mozos tienen complicaciones pa entender l'español, ¿cúmo llueo yía una llingua de las grandes, de las bonas, "de intercambio" "Es una lengua en expansión" nas suas propias palabras?
Decataivos, mious neños, d'asegún Grasa Noruega cumo d'eiquí a 50 años los hispanoparllantes van falar cola soltura d'esti señor
Lo cual, cláramente, vei ser una grandísima putada, pero yía asina.
Afondando nel pataqueiru nel que'l señor Grasa Noruega se metéu él solín, si ésta vei ser la mayor riqueza que nos vei quedar (de xuru por delantre de Villa Magdalena) ya qu'amás yía la más segura, pues vaya cagada. ¡Qué ficimos mal! ¡Áu nos enquivocamos!
Ya cumo nun podía ser d'outra manera, eiquí'l separatismu tamién yía una cousa que, bono, anque nun séi mui bien que pinta nesto, a Farturinas siempre-y paez tema recurrente. Dicen las falanderas menos fachendosas que una vez mentres que dormía suañaba con una potada de pote berzas; pero bono, tamién col separatismu.
Lo que tien claro eiquí Grasa Noruega yía que los mozos cada día damos más patadas a la llingua española ya esa yía outra, porque colos videoxuegos ya inda tamién con todos esos aparatos electrónicos inventos del Diablu, pa qué más cuntar nada.
You, polo qu'a min respecta, las consolas ya los vieoxuegos cumo que nunca me llamanon muncho. Bono, you claro, tenía un viciu bastante indecente col porno de personas mayores, lo cual tampouco foi que m'axudara muncho a la hora de desenrollar el miou cultivu llingüísticu pa cola llingua de Lope de Vega, pa que dicir lo contrario. Ya tovía puedo dicir qu'hai, hai munchos mozos que touvienon cumo you.
García Márquez, qu'escribíu Cien Años de Soledad, ya que you nun entendí nada, porque aquella xente yeran milenta, ya paecía un galimatías con tantos personaxes ya tanta hestoria, qu'hasta-y dienon el Nóbel pa que touviera quietu ya nun volviera escribir más; pues García Márquez yía un descastáu, ya tamién diz que quier abolir la ortografía, ya a ver cúmo llueo lleemos los xeniales camientos de Grasa Noruega.
Particularmente acoyóname bastante que, cola supuesta supresión ortográfica, se pueda llegar a una Revolución -quiero suponer que política- siendo un desestabilizador de primer orde, asina podía llegase a una hecatombe mundial, porque mira que nun hai xente que fale l'español -según Farturinas- Mundu Alantre.
Agora, a min personalmente, lo que me llega al alma yía esi xuiciu de valor de Farturinas cara Rajoy "el socialismo moderado de Rajoy proyecta anular la lengua".
You nun quixera conocer lo qu'a Grasa Noruega-y paez a él lo que pueda ser un gobiernu xacobín de dereicha. Nun-ylo deseo a naide.
Nenhum comentário:
Postar um comentário