La Lleenda de la Pita de los 600€

Vou cuntavos una hestoria del Mundu Ruraliegu qu'acontecéu na tierra de miou, nel Conceyu Salas, ya inda más, el peisanu (Claudio La Barraca) yía primu de miou buelu.

El casu yía que na Tierra Santa Salense cúntase de vieyo una hestoria sobre una Pita que vive pol Castru Las Cogollas, en Llinares, que vive dende la dómina Los Mouros, ya que vei prehí poniendo pol monte güevos d'ouru. La pita brilla, ya eso, ya quien tien suerte, ya ta nel monte pue pañar un güevu d'esos d'ouru; you nun vi nunca ún, pero camiento que sían macizos, ya nestos tiempos de crisis, diban facer bon avíu...

Hasta ehí la lleenda. Agora vou cuntavos, pa vosoutros, asturianistas ya lleectores moderninos, la hestoria en versión modernina, pa que vos preste.

Claudio La Barraca nun yía mouru; pero yía mediu vaqueiru. Ya vive na Barraca, que nun yía un castru precisamente, pero yía cumo una puerta haza outra dimensión: p'arriba La Barraca entaman las brañas de Maeza ya Cuideiru ya Valdés, lo dicho, yía una puerta haza outra dimensión. Ya Claudio tien negociu (un chigre-tienda), ya ente outras cousas, por mor de la sua visión empresarial, que diversificóu, tien pitas.

Pero non cualquier pitas, non. Las pitas de Claudio (ya concretamente una) val 600 naipos, ya la pita versión moderna de la de Llinares de los güevos d'ouru.

Ya nesti puntu teo qu'aclarar que los güevos de la de Llinares son güevos de pita, non de paisanu, son güevos de tortiella, non #tolanos, sin me permiten la espresión porcaz.

La pita de Claudio tien lleenda, porque nun hai munchas que valgan aquello. Él véndelas a 10€, pero you quixera la de los 600€.

Bono, nesti puntu podía sacar más punta del asuntu pero cumo Claudio fora primu de miou buelu vou deixallo tar, ya encamentar a los mious llectores a:

A) En solidaridá col afectáu (Claudio García, vecín de La Barraca, Maeza, Salas) mercá-y unas pitas (media docena, por exemplu) pa dir faciendo un piteríu, ya asina, por outru llau, el probe Claudio amortice la pita de los 600€.

B) Las pitas de La Barraca nun puenen güevos d'ouru. Pero la xente que puenga piteríu de La Barraca vei ¡por fin! comer güevos de verdá.... Amás el meiz véndelu tamién Claudio... ya sinon pola Arquera ya Llinares hailu bien bonu... Ya tamién pol restu'l Conceyu claro.

C) Quién sabe... a lo meyor mentres escueye las pitas toca una d'estas que val 600€ ou puen güevos d'ouru... Nun digáis qu'entós diba ser una ganga...

D) Participaréis nel maraviyosu mundu de la agroecoloxía ruraliega, que tamién presta, ya vei llevavos, a poucoñinos, haza la soberanía. Polo menos alimentaria.

E) Si vais a La Barraca nun vos fai falta entrar a la braña... A nun ser qu'encineguéis por entrar dende Cuideiru por Samartín de Lluiña ou dende Muñás por Valdés, pero si nun queréis nun fai falta.

F) Finalmente, si Claudio ya señora s'enrollan, el sou pote de berzas ya'l sou rabu son de fama internacional. Sólo por eso ya pola conversación con Claudio (el conocellu ya amerita'l viaxe) ya paga, de sobra, la pena. Ya esti puntu ta garantizáu.

(Na someya Claudio ta en metá d'un ritu satánicu, lleendo las preces, pa depués esfollar una pita, pero que val menos de 600€, porque nun yía tontu)